أصابع الماك آند تشيز .. Fried Mac & Cheese
هلا والله ..
كثير ناس ينظرون لبقايا الأكل بشكل خاطئ، بعض الناس وصل مرحلة إنه يفضل يرميها في الزبالة على إنه يعطيها واحد ما يلاقي شي ياكله بحجة إنها “قذارة”. أحيانا كثيرة الأكل المسخن أو البايت يتغير قوامه ونكهته ويعطينا شي أقل بس في حالات كثيرة بقايا الأكل ثاني يوم تكون ألذ منها في نفس اليوم وفي حالات ثانيه بإستخدام هذي البقايا كمكونات نسوي طبق يمكن يكون ألذ من الطبق الأصلي. الشوربة و المرق و اليخنات بشكل عام ألذ في اليوم الثاني من الأول (لو تسخنت و أنحفظت صح) لأن الحفظ الطويل يسمح للنكهات تختلط بشكل أفضل. كثير من الشوربات (وحتى البيتزا) تنوكل وهي باردة ثاني يوم وتعطي طعم مختلف عنها وهي حارة.وفي آكلات كثير (مثل الأكله اللي بنسوي اليوم) تستخدم مكونات قديمة عشان تسوي أكلات جديدة منها و الأمثلة على هذي الأكلات كثيرة مثل الفرينش توست french toast و بودنج الخبز bread pudding اللي يستخدمون خبز قديم و الفرايد رايس fried rice اللي يستخدم رز قديم وغيرهم كثير بعد. هذي الأكلات بالذات تستفيد من الأكل البايت بإنها راح تكون أحسن من نفس الأكلات لو سويناها في وقتها من الصفر ! مع هذا نلاقي بعض الناس عنده نفس العقده فيسوون فرايد رايس من رز جديد بحجة إنهم يقرفون من الرز البايت ويطلعون بنتيجة أقل ويسوون فرينش توست من خبز جديد ويطلعون بعد بنتيجة أقل من اللي تتسوى بخبز بايت.
الأكلة اللي بسوي اليوم من أبسط و أروع المقبلات ومنتشره في كثير من المطاعم الأمريكيه بالذات حولين العالم. الأكله عبارة عن ماك آند تشيز مقلي. يمكن فكرة باستا مقلية تكون غريبة وتبان مقرفة بس صدقوني في هذي طعمها شي ما ينوصف. الماك آند تشيز إذا تسخنت ما ترجع أبدا زي ماكانت بس وهي مقلية تتحول لشي رائع.
المقادير :
بقايا ماك آند تشيز محفوظه في الثلاجة لثاني يوم.
طحين
بيض مخفوق شوي
بقسماط ياباني Panko ( أو بقسماط عادي )
زيت للقلي
* يفضل تسوون وصفة الماك آند تشيز اللي سويت هنا. أي شي غيرها ما أدري إذا بيضبط أو لأ.
* الماك آند تشيز لاااازم تكون قديمة يعني لها يوم أو أكثر في الثلاجة.
* البقسماط الياباني أو البانكو (شوفوا موضوع الماك آند تشيز إذا ما تعرفون وشو البانكو) أفضله في القلي كونه خفيف ويقرمش بدون ما يعطي طعم بقسماط قوي زي البقسماط الخشن العادي بس الخيار راجعلكم. تقدرون تستخدمون أي تغطيه ثانيه تحبون زي كنافه أو كورن فليكس أو أي شي ثاني بعد.
الطريقة :
أول شي نسويه هو إننا نطلع الباستا من الصينية أو الصحن اللي أستخدمنا وبنلاقيها جمدت في كتله وحده. بعد ما نطلعها نشيل الأطراف المحروقه لو كانت موجوده ونشيل القشره اللي عالوجه.
الحين نقطع الماك آند تشيز لأصابع مربعه أو ممكن نسويها بأي شكل نبي زي كور أو مكعبات.
الحين نبدأ نغطي الأصابع بالتغطيه. نجيب ٣ صحون ، نحط في الأول الطحين مع شوي ملح وفلفل ( تقدرون تزيدون أي أعشاب أو بهارات عالطحين لو تبون ) وفي الصحن الثاني نحط البيض المخلوط و الثالث نحط فيه البقسماط ونجيب صينية أو صحن رابع عشان نحط فيه الحبات اللي خلصنا. نبدأ بإننا نغطس الأصابع في الطحين بعدين نهزها عشان نشيل الطحين الزايد بعدين نغطيها بالبيض من كل الجهات و آخر شي في البقسماط وبعدين نحطها على الصحن الأخير ونكمل كذا ببقاي القطع. بعد ما نخلص من كل القطع نخليها ترتاح في الصحن تقريبا ١٠ دقايق هذا بيخلي البيض يلصق باقي المكونات عليها وبكذا ما تنفصح التغطيه في الزيت بسهوله.
عند هذي المرحلة تقدرون تحطون الأصابع في أكياس وتحفظونها في الفريزر وبكذا تصير جاهزه عندكم في أي وقت. إذا جيتوا تطبخونها بعدين أقلوها علطول من الفريزر بدون تذويب.
الحين المرحلة الأخيره وهي القلي. نسخن زيت في قدر كبير على حراره أعلى من وسط بشوي إلين يصير الزيت حار ( ٣٧٥ فهرنهايت للي عندهم ميزان حراره قلي ). نقلي الحبات إلين تقلب القشرة لون ذهبي فاتح بعدين نشيلها ونحطها على ورق نشاف عشان يشرب الزيت ونرشها بشوي ملح وهي حاره. تتقدم وهي حاره مع كتشب أو أي صوص ثاني يكون شوي حامض أو حلو عشان يكسر الدسم.
التعليقات مغلقة.
ماشاء الله توي اشوف المدونه وما اقول الا الله يحفظك
خلاص ياولدي ياخلودي..رحت على معلوماتك عن نفسك واستمتعت بعصاميتك..
ياليت عندي بنت للزواج كان مالقيت لها عريس زيك..
الله يرزقك بنت الحلال اللي تستاهلك..
عموما .. طور نفسك ف هندسة البرمجيات.. والطبخ كهواية وبزنس..
دعوااااااتي
آآآمين ..
ماشاء الله عليك.. تبارك الله
الله يحفظك ويسعدك ويبارك فيك..
أنا اليوم .. اول مرة أدخل على مدونتك .. لاقوة إلا بالله..
إبداع .. لامحدود..
أبسألك ياولدي .. إنت دارس الطهي ولا هاوي ؟؟
هلا والله …
الله يحييك دايما …
ما درست رسمي بس بعد منيب هاوي ، أشتغلت في كذا مطعم
i’m Doda
على فكرة كتير حلو اننا نستخدم الاكل البايت فى اكلات تانية مفيدة وممكن تكون بسيطة لكنها حلوة لما نجمعها فى اكله تانى خالص انا ساعات بعمل كدا كتير وخصوصا ان بيكون فى اكل بايت كتير عندى .
بالضبط هذا المفروض غير إنه أصلا شي ممتع إنك تجربين تسوين شي من أكل بايت تطلعين أحيانا بوصفات حلوه منها.
ع فكرة موضوعك كتيير مهم انا بالنسبة الي بحب استخدم الاكل البايت بدل رميو حتى اني الاسبوع الماضي كان في عنجي بقايا دجاج مشوي بتعرفو شو عملت::
شرحت بصل جوانح وبعدها قطعت بقايا الدجاج شوحت البصل واضفت الجاج عليه حطيت شوية ملح وفلفل اسود شوي عشان الجاج اصلا متبل ولما تحمرو شوي لفيتهم في خبز لبناني وحمصتهم ع الجريل
طلعو كتير طيبين وناوية اعملهم كمان مرة
ماشاء الله تسلم يدك شكلها روعة وفكرة فعلا ممتازة
صباح الخير شيف.
بالنسبة لي احب دايم استخدم البايت على اساس حرام رمية خصوصا لو كان طبق لذيذ .
الشي الثاني احيانا تكون مستعجل ولا يمدي انك تحضر طبق جديد .
عموما فكرة رائعة جدا ,لكن عندي سؤال هل تتوقع تنفع الفكرة مع مكرونة بالباشميل خصوصا انه اذا صار بايت يكون متماسك بشكل كبير .
في الاخير اشكرك من كل قلبي على وقتك وافكارك وابداعاتك .
صباح النور و السرور …
زي ماقلت في الموضوع مافيه شي يمنع بس مدري مالك إلا تجربين ، الوصفه اللي أستخدم ضامنها ومجربها غيرها ما أعرف.
خلاص اجل انا اجربها واعطيك خبر , سواء نفعت او لا ..
احلى شي في الطبخ والمطبخ انك تجرب ابداعك وتفتح المجال لنفسك انك تجرب وتطلع بافكار ونكهات جديدة .
بالضبط كانك ترسم لوحة ,خاصة فيك مهما حاولت تقلد او تتبع خطى غيرك ,يكون احساسك له الاثر الكبير.