تخطى إلى المحتوى

أمثلة لوصفات بيتزا .. Pizza Examples

27/09/2011

هلا والله …

 

هذا الموضوع تكملة لموضوع البيتزا الإيطالية. في هذا الجزأ راح أحط أمثلة لكم نوع بيتزا. بحاول أنوع قدر الإمكان في محاولة إننا نكسر حاجز الخوف من الغريب و الجديد.

 

بيتزا مارجريتا .. Pizza Margherita

 

هذي البيتزا من أشهر و ألذ أنواع البيتزا حولين العالم. سبب التسمية هو زيارة الملكة مارجريتا لمدينة نابولي ( عاصمة البيتزا ) ومن باب الإحتفال سووا بيتزا فيها علم إيطاليا اللي هو الأحمر ( الصلصة ) ، الأبيض ( الجبن ) و الأخضر ( الريحان ) وهذي بالضبط مكونات هذي البيتزا. نفس المكونات لو زدنا عليها شرايح أنشوجة تصير بيتزا رومانا pizza romana أو البيتزا الرومانية. المارجرايتا اللي أسوي أستخدم فيها صلصة طماط + موزاريلا طازة وموزاريلا ناشفة + طماطم مجففة sundried tomatoes و بعد ما تطلع من الفرن أرش عليها زيت زيتون وريحان طازج وشوي بارميجانو ريجانو.

بيتزا مارجاريتا

margheritta

 

بيتزا فواكه البحر بالبيستو و جبنة الفونتينا .. Pizza e frutti de mare

 

اللي ما يعرف البيستو يشوف هنا.

 

هذي وحدة من ألذ ألذ أنواع البيتزا اللي ذقتها بحياتي. البيتزا ممكن تنعمل بأي نوع من المأكولات البحرية زي الربيان أو اللوبستر أو حتى المسل (بلح البحر) أو القواقع أو الكلماري. نقدر نستخدم وحدة منهم بس أو أكثر نخلط أكثر من نوع. نبدأ بإننا نخلط اللحم اللي بنستخدم مع شوي بيستو ريحان بعدين ندهن عجينة بيتزا بعد ما نفردها بصلصة وبعدين نحط الربيان وآخر شي طبقة من جبنة الفونتينا. جبن الفونتينا نوع من أنواع الجبن الإيطالي ، يذوب بسهولة وله تقريبا نفس قوام الموزاريلا بس بطعم أقوى شوي.

 

بيستو الربيان
seafood pesto pizza

 

 

بيتزا الفطر .. Pizza al Funghi

 

فيه آلاف الطرق اللي نقدر نسوي بيتزا بالفطر. في هذي النسخة راح أستخدم فطر بورتابيللو Portabello mushroom مع بصل أحمر وجبن موزاريلا وصلصة طماطم عادية وبعد ما تطلع من الفرن برشها بشوي زيت فقع أو truffle oil وشوي ريحان وبارميجانو ريجانو. فطر البورتابيللو فطر كبير في حجمه وله طعم “لحمي” قوي ، تقدرون تستبدولنه بفطر أبيض طازج عادي أو أي نوع فطر تحبون. في حال توفر عندكم فقع جربوا تستخدمونه مع البيتزا وشوفوا كيف الطعم. كون فترة الطبخ قصيرة في البيتزا ما تتدمر نكهة الفقع زي مايصير في أغلب الأحيان في الطبخ الشعبي.

 

pizza al funghi

 

pizza al funghi

 

بيتزا البيبروني .. Pepperoni Pizza

 

في آخر دراسة عن أكثر بيتزا مطلوبة بيتزا البيبروني فازت بأكثر عدد من الأصوات. بيتزا البيبروني سهلة .. صلصة ، بيبروني وجبن موزاريلا بس . كثير ناس سألوني عن البيبروني ، البيبروني هو نوع من أنواع السجق أو النقانق. يسوونه بإنهم يفرمون لحم مع شحم وبهارات ( بهارات كثيرة منها بابريكا وفلفل حار وثوم ) وبعدين يملحونه ويدخنونة وآخر شي يخلونه ينشف ويتعتق أو يتخمر بالأصح وهذا اللي بيعطيه طعمه.

 

pepproni pizza

بيتزا بيبروني

بيتزا البيبروني

 

 

كالزوني الخضروات .. Vegetable Calzone

 

الكالزوني نوع من أنواع البيتزا اللي تكون مقفلة زي المحفظة تقريبا. كل المباديء اللي تكلمت عنها للبيتزا تمشي هنا الفرق بس في  طريقة الفرد و اللف.

 

تقدرون تسوون الكالزوني بأي حشوة تبون أنا أستخدمت هنا صلصة طماطم مع جبن موزاريلا فريش و ناشفه ، ذرة ، فلفل أحمر مشوي ( تلاقون طريقة شوي الفلفل هنا ) ، ريحان ، بقدونس ، سبانخ وبصل أحمر. المكونات تمشي مع بعضها بشكل جدا جدا ممتاز هنا.

 

عشان نسوي الكالزوني أول شي هو إننا نفرد العجينة لأنحف شي نقدر عليه بالضبط زي ما سوينا في البيتزا العادية. بعدين نبدأ نرص المكونات في نص البيتزا بس ونخلي النص الثاني فاضي. آخر شي نقفل النص الثاني على النص الأول بحيث يعطينا شكل نص دائرة وبعدين نلصق الأطراف في بعضها.

 

ندهن الكالزوني بشوي زيت زيتون وبعدين نقطع كم فتحة فوق عشان نهوي الحشوة وما تنفجر علينا داخل الفرن. آخر شي نحط الكالزوني فوق الحجر بالضبط زي ما سوينا في البيتزا إلين تستوي من فوق وتحت.

 

Vegetable Calzone

كالزون الخضروات

vegetable calzone

 

بيتزا فطر الشيتاكي مع جبنة الماعز و الزعتر .. Shitake mushroom , thyme and goat cheese pizza

 

هذي البيتزا نوع من الأنواع اللي يسمونها بيتزا بيضاء يعني بدون صلصة طماطم. راح أستخدم هنا نوعين فطر هم الشيتاكي و الفطر الأبيض العادي. تقدرون تستخدمون أي نوعين فطر موجوده أو حتى نوع واحد لو ماكان موجود إلا هو. جبنة الماعز goat cheese من ألذ أنواع الجبن ، قوام هذا الجبن ونكهتة جدا مختلف عن أنواع جبن البقر اللي الغالبية متعود عليها. حليب الماعز يعطي الجبن هذا نكهة وقوام خاصيين.

 

بعد ما نفرد العجينة ندهنها بطبقة زيت زيتون بعدين نحط فوقها فطر الشيتاكي المقطع و الفطر الأبيض العادي وبعدين نقطع عليها قطع من جبن الماعز ونرش عليها شوي من جبن الفونتينا بعدين رشة ملح وفلفل أسود وزعتر طازج thyme وبعدين ندخلها الفرن. بعد ما نطلعها من الفرن نزينها برشة زيت فقع وجبن بارميزان.

 

moving pizza to oven

بيتزا الفطر البري و جبنة الماعز

goat cheese , shitake mushroom and fontina pizza

 

بيتزا الفونتينا و الشيتاكي

 

 

بيتزا كابريسي .. Caprese Pizza

 

كابريسي يعني على طريقة كابري اللي هي وحدة من مدن إيطاليا. فيه سلطة مشهورة جدا بهذا الإسم اللي هي سلطة الموزاريلا مع الطماطم ومكونات هذي البيتزا أبدا موب بعيدة.  البيتزا مستخدم فيها صوص بيستو بدال صوص الطماطم وفوق البيستو حطينا طماط صغار مع موزاريلا بوفالا ( موزاريلا الجاموس ). بعد ما تطلع البيتزا من الفرن رشينا عليها صوص بلسمك.

 

أول شي نسويه هو صوص البلسمك. في قدر صغير نطبخ ٣ أكواب خل بلسمك ( من النوع الرخيص ) على غليه خفيفه إلين يبقى منها كوب واحد ويثقل الخليط ويتحول لسائل ثقيل. ننقل الصوص لصحن ونخليه يبرد قبل نستخدمه. هذا الصوص جدا لذيذ وله إستخدامات كثيرة جربوه مع السلطات أو كصوص مع اللحوم أو غيره أو حتى مع الفراولة أو الإسكريم.

 

نفرد العجينة بعدين ندهنها ببيستو ريحان بعدين نقطع فوقها شوي جبن موزاريلا طازه (يفضل من نوع موزاريلا بوفالا) وبعدين نرص فوقها حبات طماط صغار مقطعه أرباع. ندخل البيتزا الفرن وبعد ما تطلع نرش عليها شوي زيت زيتون و أوراق ريحان ونبشر عليها شوي بارمزان وآخر شي نصب عليها شوي من صوص البلسمك.

 

بيتزا كابريزي

 

 

caprese pizza with balsamic reduction
بيتزا كابريزي مع صوص البلسمك

 

caprese pizza

 

 

بيتزا البيض مع الخضروات و الجرجير .. Egg and Vegetable Pizza with Arugla

 
بيض في بيتزا ليش لأ ؟ كله بروتين D-: . هذي البيتزا مثال ثاني على البيتزا البيضاء أو البيتزا بيانكا وصدقوني جدا جدا لذيذة. هذي البيتزا تنفع بالذات كفطور متأخر أو اللي يسمونه برنش brunch .  طريقة عمل هذي البيتزا تختلف شوي عن الطريقة العادية كوننا بنحط البيض بعد ما تنطبخ القشرة نص طبخة عشان ما تخربها. الخضار المستخدمة هي الفلفل الأحمر المشوي مع زيتون الكلماتا المنزوع النوى وحلقات البصل. حلقات البصل بالذات ضرورية هنا كوننا بنكسر البيض داخلها عشان تمسك البيض وهو فوق البيتزا. الجبن المستخدم هنا بيكون جبن بارمزان بس وتقدرون كالعادة تضيفون نوع ثاني لو حابين.

 

نبدأ أول شي بإننا نفرد العجينة بعدين ندهنها بشوي زيت زيتون وبعدين نحط الفلفل الرومي الأحمر المشوي ( طريقة شوي الفلفل هنا ) وبعدين زيتون الكلماتا منزوع النوى و بعدين نحط بصل مقطع حلقات عريضة ، نرش شوي جبن بارمزان وبعدين ندخل البيتزا الفرن إلين تتحمر الأطراف. بعد ما تتحمر الأطراف نطلع البيتزا من الفرن ونكسر بيضتين ( أو حسب الرغبة ) داخل حلقات البصل بعدين نرش البيض بشوي ملح وفلفل أسود ونرجع البيتزا للفرن إلين تكمل أستوى ويستوي البيض للدرجة اللي حابين. بعد ما تستوي البيتزا نطلعها من الفرن ونرش عليها كمية من الجرجير وإضافة بارمزان لو حابين.

 

بيتزا البيض و الجرجير

 

breakfast pizza

 

بيتزا بيضاء مع البيض و الجرجير و الخضروات

 

egg pizza

 

بيتزا بالبيض و الخضروات

 

Follow TopChefCooks on Twitter

الإعلانات
53 تعليق
  1. 30/10/2012 8:41 م

    اخويا خالد تعديل بسيط على بيتزا بيبيرونى كلمه بيبيرونى بالايطاليه يعنى فلفل عادى وليس حار انت تقصد بيتزا بيبيرينشينو وهذا هو المقصود من الشرح الى حضرتك شرحته هذا للتوضيح ليس اكتر وللك جزيل الشكر اخوك فى الله محمود

    • 30/10/2012 8:44 م

      اقصد بيرشوتو

      • 30/10/2012 9:42 م

        البيبروني نوع من أنواع السجق زي المرتديلا و السلامي وغيرهم. بيبرونشيني يعني فلفل بس ما أتذكر إني نزلت أي بيتزا بالبيبرونتشيني ؟ البروشوتي نوع لحوم مملحة يشبه البيكون ماله علاقة بالبيبرونشيني أبدا …

  2. 21/10/2012 5:28 م

    السلام عليكم :محمود شكر من مصر
    ممكن اعرف من حضرتك ايه الفرق بين البيتزا الايطالى والبيتزا الامريكى وبرجاء عايز مقادير البيتزا الامريكيه
    وشكرا للك يا شيف خالد والى الامام دائما اخوك محمود

    • 21/10/2012 6:51 م

      وعليكم السلام و الرحمة ….

      البيتزا الإيطالية عجينتها جدا بسيطة (طحين ، خميره ، ملح ، مويه وشويييي زيت زيتون) ، تنعجن وتنفرد نحييييييفة (شوف موضوع البيتزا). البيتزا الإيطالية تكون نحيفة ، مقرمشة ، وبدون إضافات كثيره هي أكله جدا جدا بسيطة. البيتزا الأمريكية ماخذة من البيتزا شي واحد بس وهو إنها عجينة فوقها صلصة وجبنه. الباقي كله يعتمد على مين تسأل في أمريكا. بعض الوصفات جدا جدا دسمة وليانه زبدة أو زيت أو حليب وبعض الوصفات قريبة من الإيطالية بس مع إضافات كثيره فوقها. البيتزا الأمريكية زي ما ذكرت راح تختلف حسب مين تسأل ، البيتزا في شيكاغو مثلا تكون متينه ودسمه ومخبوزه في صينية بينما البيتزا في بروكلين في نيوورك تكون قريبة من الإيطالية بس مع كمية صلصة وجبنه أكثر وبدون إهتمام كبير في جودة المكونات اللي تنحط فوق زي ما يصير في إيطاليا … طبعا في أشكال ثانيه للبيتزا عندهم جدا صعب تغطيتها كلها.

      البيتزا بالنسبة لي هي بيتزا إيطالية ….

      • 21/10/2012 7:22 م

        الف الف الف شكر يا شيف خالد انت فعلا كبير وانا والله استفدت منك كتير
        ربنا يخليك والله انا اكتر من ممتاز

  3. غير معروف permalink
    28/09/2012 1:05 ص

    لك جزيل الشكر

  4. غير معروف permalink
    24/09/2012 7:18 ص

    السلام عليكم شيف. وين الاقي مقادير عجينة البيتزا حقتك. دورتها فوق ما لقيتها

    • 24/09/2012 11:02 ص

      في الموضوع اللي قبل اللي إسمه البيتزا الإيطالية

  5. 21/09/2012 7:07 م

    واو تشهيت البيتزا كتيييير

  6. 12/09/2012 6:36 ص

    تحيه طيبه ياسيدي

    استفسار بسيط اين اجد حجر البيتزا ؟؟

    • 12/09/2012 11:12 ص

      هلا والله …

      ذكرت كل شي يخص الحجر في موضوع البيتزا الأول ….

  7. انا permalink
    13/08/2012 3:49 م

    السلام عليكم
    شيف ممكن تتكلم عن انواع الجبن و افضل شي للبيتزا

    لان دايم احتار اذا بغيت اشتري جبن من كثر الانواع

    اغلب الجبن الموزارلا المبشور جاهز. يكون ماله طعم ويغلب عليه الزيت ويتمطط بشكل مبالغ فيه واذا بردت البيتزا يكون الجبن زي البلاستيك ومجلد 😦

    • 13/08/2012 6:25 م

      وعليكم السلام و الرحمة ….

      عدتها كثير في الموضوع …. موزاريلا فريش !!!!

  8. 20/07/2012 12:39 ص

    يعطيك العافيه مبدع اشاء الله عليك
    مدري وصفة العجينه حقت البيتزا منزلها انت والا لا؟

    • 20/07/2012 12:44 ص

      هههه اقري الموضوع وتعرفين

  9. غير معروف permalink
    05/07/2012 2:37 ص

    ما شاء الله موضوع حلو ومعلومات حلوه يعطيك العافيه

  10. 02/06/2012 12:45 م

    اقدر اسوي البيتزا على صاج ؟ الصاج العادي بس احطه جوا الفرن ؟

    • 02/06/2012 1:07 م

      تقدرين بس مافيه شي جديد زيه زي صينية الفرن المقلوبه بالضبط

  11. roro permalink
    09/05/2012 5:13 م

    اللحين همه نو الريحان ياللي يستخدمونه نفس الريحان اللي متعارف عليه عندنا ؟!!!

    • 09/05/2012 9:20 م

      الريحان أنواع كثيرة بس عموما كله يشترك بالطعم الأساسي القوي

  12. 05/05/2012 10:59 م

    يعني تلقى البيبروني في قسم اللحوم المبرد هـ لااني ولامره شريته بس بعد ماشفته هنا تحمست

    • 05/05/2012 11:30 م

      تلاقينه عند اللي يبيعون الاجبان بالكيلو

  13. 05/05/2012 9:47 م

    السلام عليكم
    بغيت اعرف وين مكان البيبروني الثقة في جده لااني احبه بس أخاف اشتريه من اي مكان وسؤال ثاني شيف الموزاريلا الجافه هل هي الي تنباع مبشور هـ جاهزه في البرادات مثل برايد والمراعي مثلا وشكرا

    • 05/05/2012 10:11 م

      وعليكم السلام و الرحمة …

      مافهمت وش قصدك بثقة الصراحة هههههه ؟ كلهم نفس الأنواع ، كل سوبرماركت يبيع نفس الأنواع.

      الموزاريلا الجافه هي أي شي ما يجي في مويه.

  14. 04/05/2012 5:03 م

    بخصوص مكعبات الدجاج .. إذا قطعتها زي ما تقول .. تقلبها على النار ؟ والا تدخلها الفرن مع البيتزا وهي مانضجت ؟

    • 04/05/2012 5:23 م

      كله موجود في الموضوع اللي قبل هذا . شرحت كل شي عن الحشوات.

  15. 01/05/2012 8:22 م

    كيف اعمل دجاج البيتزا ؟
    المكعبات

    • 01/05/2012 8:34 م

      ؟ تاخذين صدر دجاجه ، تقطعينه شرايح طولية بعرض المكعبات اللي تبين بعدين تاخذين هذي الشرايح وتقطعينها مكعبات بحجم المكعبات اللي تبين. إذا واجهتي صعوبة لايردك إلا لسانك D-:

  16. rania permalink
    17/04/2012 11:45 ص

    عفوا اخي شكرا جزيلا

  17. rania permalink
    14/04/2012 2:26 م

    ماشاللة عليكي فنانة مرة شكرا
    ع الجهود الرائعة

  18. أيمي permalink
    01/04/2012 5:52 م

    عندي فضول
    ماعندك مطعم او مافي بالك تفتح مطعم

    • 01/04/2012 6:12 م

      هلا والله …

      لا والله ما عندي بس إن شاء الله في المستقبل.

  19. غير معروف permalink
    28/03/2012 5:46 ص

    يعطيك العافية شيف
    انا كتير حبيت مواضيعك و بصير اتابعك ان شاء الله
    بس عندي سؤال لوصفة بيتزا مرة اكلتها في مطعم اسمها garlic pizza
    ممكن اذا عندك الوصفة تنورنا فيها…
    شكرا

    • 28/03/2012 6:59 ص

      الله يعافيك ….

      مافيه شي واحد بهذا الإسم فيه كذا طريقة تقدرين تسوين بيتزا بنكهة ثوم وكلهم تقدرين تسمينهم بيتزا ثوم بدون مشاكل.

      تقدرين تسوين البيتزا مع شوي زيت وثوم بدون أي جبن ، تقدرين تسوينها زي كذا مع شوي بارمزان مثلا ، تقدرين تسوين بيتزا بصلصة طماط عادية بس تطعمين الصلصة بثوم زيادة أو تقطعين عليها ثوم كبار. تقدرين تسوين صوص ثوم أو ثوم مهروس وتدهنين البيتزا فيها بدال صوص الطماط مثلا وبعدين تحطين أي شي تبينه فوق الصوص ومتأكد لو بتفكرين فيها بتلاقين طرق ثانية كثير.

      أنتي ذقتي البيتزا هذي وش الطعم اللي تتذكرين ذقتيه أو وش المكونات اللي شفتيها ؟ ما تحتاجين وصفة لكل شي حاولي تشوفين وش كانوا حاطين وسوي زيهم.

      • غير معروف permalink
        29/03/2012 2:24 ص

        انا هيك بعمل بالعادة بس ما عرفت كيف اضيف الثوم كانت نكهته قوية بس ما كان في قطع
        يعني كان فيها زيت زيتون وثوم وجبن بس..
        بس يعني اطحن الثوم او كيف اعمله مو حابة يكون قطع..
        يعني مثلا خبز الثوم بهرس الثوم وبمزجه مع زبدة وبدهن فيه الخبز .. ممكن تكون هيك انه ادهن زيت على العجين واهرس الثوم منيح واحط عليها جبنة؟؟؟
        شكرا شيف انت كتير زوء
        الله يعطيك العافية

        • 29/03/2012 2:54 ص

          زي ماقلت بدون ما اكون ذقتها صعب اعرف الطريقة بالضبط.

          فيه كذا طريقة ممكن يكونون استخدموها ممكن حتى مايكون فيها ثوم ابدا يعني مجرد زيت زيتون مطبوخ على ناو هاااادية مع فصوص ثوم بحيث تطعمين الزيت بالثوم وبعدها تستخدمين الزيت بس. ممكن يكونون مستخدمين ثوم محمر في الفرن وبعدين مطحون وبكذا يذوب تقريبا فزي ما قلت مقدر للأسف اعرف.

          اكيد جربي تخلطين زيت بثوم وتدهنينها وشوفي كيف بتطلع لذيذة اكيد حتى لو ماكانت زي حقتهم يعني ماعليك خسارة ان شا الله

      • غير معروف permalink
        30/03/2012 12:04 م

        شكرا شيف بجرب يعطيك العافية

  20. نور permalink
    02/03/2012 7:01 م

    شيف عندي سؤال
    اذا كان عندي عزيمه عشاا
    ممكن افرد كل العجينه و احط الاضافات اللي ابيها فوق كل قطعه بيتزا و اخليها مده نص ساعه الى ساعه من غير لا تدش الفرن
    عشان كل شي يكون زاهب
    و اول ما يوصلون الضيوف ادخل البيتزا بالفرن وحده ورا الثانيه ؟
    و لا ما ينفع ؟

    • 02/03/2012 7:22 م

      للأسف لأ العجينة بتشرب المويه من الصلصه وغالبا بتلصق عالخشبه حقت الفرن او بيصير صعب تحريكها من يوم تحطين كل شي عليها.

      من يوم تدخل كل حبه الفرن عندك وقت اكثر من كافي تفردين وتزينيين الحبة اللي بعدها.

  21. 30/01/2012 7:11 ص

    is sooooooooooooo good

  22. 30/01/2012 7:10 ص

    wow is vary naic emememe thanc u chef

  23. 14/01/2012 6:40 م

    واااو أبغى بيتزا
    تسلم ايدك شيف

  24. 29/10/2011 3:22 ص

    يعطيك العافية والله 🙂
    ,
    بضيف اقتراح بعد إذنك D:
    نحط صلصة الطماطم والموزاريلا ونحط فوقها قطع طماطم وكوسة مشويين واحط حلقات فلفل حار (مكبوس في زيت زيتون وثوم)
    وبعد ماتطلع ارشها ملح خشن ورشة من زيت الفلفل

  25. نور permalink
    01/10/2011 1:24 م

    شيف بالنسبه حق صوص الطماط اللي استخدمته اهو نفسه صوص الطماط الاساسي ؟
    لان اللي اعرفه ان البيتزا اللي من نابولي يكون صلصه الطماط اللي فيها مو مطبوخه
    و يخلونها تنطبخ بالفرن الخاص
    هل ينفع هالشي بهالوصفه ؟
    و شلون اسوي صلصه الطماط اللي مو مطبوخه
    و مشكور

    • 01/10/2011 2:52 م

      أقري موضوع البيتزا الإيطاليه

  26. غير معروف permalink
    30/09/2011 5:49 م

    الله يعطيك العافيه اعشق البيتزا بانواعها

    • 21/09/2012 7:12 م

      وانا اعشق البيتزا مؤ بس لحلكي

  27. غير معروف permalink
    27/09/2011 7:09 م

    السلام عليكم
    روعه روعه الخيارات
    الله يعطيك العافيه
    بس فيه نوع من البيتزا يكون حالي يسمونه عش البلبل
    وعلى ما اعتقد انهم يدهنون البيتزا باللبنه وبعدين الجبن واذا استوت يرشونها بالعسل

    • 27/09/2011 8:36 م

      وعليكم السلام …

      الوصفة هذاك كتبتيها ؟ ليش الخوف ؟ جربي وسويها وشوفي وش يصير وش أقصى شي ممكن يصير ؟

    • amany permalink
      22/05/2012 3:44 ص

      عش البلبل معجنات او فطاير سوريه شاميه مالها دخل بالبيزا

التعليقات مغلقة.

%d مدونون معجبون بهذه: