… Ask me
السلام عليكم
هنا تنحط كل الأسئلة الخاصة بالطبخ وراح أجاوب عليها إن شاء الله في أسرع وقت.
* ياليت ياليت لو تسون بحث عن الوصفة في المدونة أو في صفحة الوصفات قبل السؤال ،هذي الصفحة للإجابة عن الأسئلة موب دليل هاتف للمدونة.
* أي سؤال عن مكان توفر مكون أو جهاز سواء في جده أو غيرها هو شي موب من إختصاصي وسيتم حذف السؤال.
* في حالة السؤال بدون تعبئة كل المعلومات المطلوبه مثل الإيميل و الإسم وغيرها يمكن يتأخر ظهور السؤال فيرجى عدم تكرار الأسئلة في حالة عدم ظهورها في نفس الوقت.
ملاحظة : ما يحتاج إنكم تكتبون الإسم و الإيميل و الموقع بس أكتبوا الرساله وخلوا الباقي فاضي
11٬279 تعليق
التعليقات مغلقة.
مدونة توب شيف ... Top Chef 
أها .. طيب الله يرضى عليك عندك طريقة باستخدام بواقي عجينة الكنافة؟ للأسف النوع المتوافر عندنا مكسّر والخصل قليلة وهي اللي أستخدمها في عش البلبل ولفائف الدجاج، البواقي كثيرة عندي وكلها مكسرة ما تنفع للوصفات اللي أعرفها .. عندك طريقة مفيدة؟
+ نفس الكلام مع الفيلو بيستري، ما عندنا إلا ماركة السنبلة وللأسف جافة نوعا ما وتتكسر وما أعرف وش أسوي في البواقي الكثييييرة!!
أحسن شي تسوينه في الإثنين هو إنك تستخدمينهم كتغطية للقلي بدال البقسماط. لو كانوا كبار قطعيهم شوي وبس أستخدميه عادي. تقدرين تقلين أي شي وتغطينه بكنافه أو عجينة فيلو مقطعه صغار يعطي طعم حلو للمقالي.
مرحبا توب شيف، لقيت عندنا خل الملت ما أعرف من اشتراه وما أعرف بإيش ممكن يستخدم فقلت أسألك هو عبارة عن إيش؟
+
الويستشير صوص يستخدم في التتبيلات فقط والا له استخدامات ثانية ؟
الملت هو الشعير (أو أي نوع حبوب) اللي بدأ ينبت. الشعير العادي زي كل الحبوب عباره عن نشا مع نكهة جدا ضعيفة بس إذا نقعوا هذي الحبوب في المويه وبدت تنبت تنشط داخلها أنزيمات تحول النشا لسكر وتغير طعم الحبوب لشي ثاني. هذي الحبوب اللي توها باديه تنبت يجففونها ويطحنونها وهذا هو الملت. يعني الشعير اللي كان نشوي وبدون طعم تحول لشي حالي وبنكهة حلوه تقريبا زي نكهة وريحة البيره.
خل الملت هو الخل اللي يصنعونه من الملت وهو بالضبط بالضبط خل البيره. زي ما إن خل العنب هو خل النبيذ أو الواين هنا يستخدمون بيره عشان يسوون الخل.
خل الملت له نكهة حلوه ويستخدم عادي مع السلطات أو الصوصات كلمسة أخيره أو حتى التتبيلات.
الوستشير حطيه مع أي شي تشوفين إنه يمشي معه مافيه قواعد لإستخدامه بتلاقين صوصات وخلطات كثير يستخدم فيها غير التتبيلات.
السلام عليكم
اول حبيت اشكرك على مجهودك وتعبك معنا
و بصراحه فعلا انت ( top )
استفساري بخصوص الماكرون الفرنسي
سويته ثلاث مرات في المره الثالثه كانت النتيجه مرضيه طلعت القبه ناااعمه و نفش تمااام وطلعت الياقه
بس فيه ملاحظه صغيره عليه اللي هي فراغ في الوسط ( تحت القشره على طول ) بس فراغ بسييط مو كبير مع اني طبقت المقادير و الخطوات بحذافيرها ب
إعتقادك وين المشكله ؟؟؟
الشي الثاني سؤال عن الحشوات
انت بينت انه ممكن احط الحشوه اللي احب
بس بصراحه ما عرفت
يعني لما اسوي ماكرون بالفستق ايش احط حشوه ( ياليت المقادير والطريقه )
وبعد مره سويت بنكهة الفراوله حشيته بمربى جاهز طلع طعمه مو حلو
الخلاصه طلبي حشوااات ماكرون بالمقادير والطريقه الله يجزاك خير
قلبت قوقل واليوتيوب ما حصلت شي يفيدني
وجزاك الله خير
هلا والله …
الفراغ مدري هو مفروض يكون فيه فراغ بس جدا صغير وغالبا صعب تلاحظينه لأن من يوم تاكلينه يتكسر الماكرون في فمك (هذا المفروض) . إذا فيه فراغ كبير وباين شوفي الموضوع كتب الحل هناك.
بالنسبة للحشوات صعب إذا ماكان مستحيل إني أكتب كل حشوة ممكنه وغير كذا فيه ملايين الطرق عشان تسوين كل حشوه في راسك. مثلا لو قلنا ماكرون فراوله نقدر نسوي الحشوه بكذا طريقة : نقدر نسوي بتر كريم وننكهة بفراولة طبعا فيه ٣ أنواع بتر كريم ففيه ٣ خيارات هنا بعد هل نسويه ببتر كريم فراوله أمريكي ولا إيطالي و لا سويسري. بعد كذا عندنا المربى وهذا خيار ثاني ، بعد كذا عندنا الويب كريم أو الكريمة المخفوقه نقدر ننكها بفراولة وغير كذا نقدر نسوي موس فراوله ونحشيها فيها ونقدر نسوي كسترد فراوله ونحشيها فيها ونقدر الكسترد نخففه بشي ثاني عشان يكون منفوش وفوق هذا كله نقدر نضيف ونخلط مكونات ثانيه مع الفراوله عشان نسوي نكهات ثانيه. فلو لاحظتي هم كلهم ماكرون بحشوة فراولة بس شوفي كم طريقة نقدر نسوي الحشوه فيها ؟ طبقي نفس الكلام على كل نكهة وبتفهمين وش أقصد.
لاحظي على كثره الطرق اللي نقدر نحط نكهة الفراولة في الماكرون إلا إن كل واحد من هذي الطرق بيعطي نكهة وقوام مختلف تماما عن الثاني. طريقتي في المدونة هي إني أشرح الأساسيات وكيف تغيرينها وتستفيدين منها. أرجعي أقري موضوع الويب كريم وموضوع البتر كريم وشوفي كيف تقدرين تنكهينها بالنكهات اللي تبين وباقي الأساسيات بشرحها في الطريق إن شاء الله بس موضوع إني أنزل كم حشوه هذي صعبة شوي آسف.
بالنسبة للفستق شوفي موضوع ملفيه الفستق وسوي الكسترد اللي أستخدمت هناك بيكون رهيب معه. أو تقدرين تستخدمين زبده فستق عاديه (بعد طريقتها موجوده في المدونة)
مربى الفراولة شخصيا تعجبني كحشوة لأنها تعطي نكهة فراولة طبيعيه وواضحة وهي المستخدمه بعد بشكل كبير في كثير محلات بس إذا ماكانت الحشوه لذيذه لحالها جربي ماركة مربى ثانيه ترى يفرقون كثير.
سؤال جدي
ليه ماتشارك ببرنامج مثل ماستر شيف احسك مناسب لهم تحب تبتكر وحسك عالي بالتقديم ماشاء الله
هههههه تخيليني في التلفزيون مستحيييييل .
اشتريت لوز مطحون جاهز للكارون بس ماكان ناعم مره عادي والا لازم يكون ناااعم ؟
زي ماكتبت في الموضوع
ممكن طريقة فطيرة التفاح الأمريكية التقليدية ؟
تلاقينها في صفحة الوصفات
يــب قصدي بيض مسلوق محشي بالصفار مخلوط مع أشياء ثانية
و إذا ما فيها كلفة حبيت أعرف النوع الأول .. شكله غريب و مثير للفضول !!!
أسلقي البيض (تلاقين الطريقة بالضبط في صفحة الوصفات) بعدين حطيه في حمام ثلجي عشان تبردينه بسرعه. الحين قشريه و أقسميه بالنص وشيلي الصفار و أخلطي عليه مايونيز + أي أي أي أي بهارات أو أعشاب تحبين. الكراث مع رشة فلفل حار و شوي ملح وفلفل رهيب وكافي بس فيه ملايين الخلطات والإضافات اللي تقدرين تحطين. تقدرين تسوينها بنكهة هنديه زي كاري أو جارام ماسالا وبتكون رهيبه مره بعد.
النوع الأول هذا يسمونه poached egg اللي هو بيض مسلوق بس بدون القشر يعني نكسر البيضه في المويه علطول. هو طريقة أساسية في طبخ البيض بغطيها إن شاء الله بشكل مفصل إذا بديت موضوع البيض.
مرحبا شيف
ابغا اسوي الدجاج الي بالكريما والطرخون بس اذا مالقيت طرخون يطلع حلو بالثوم المعمر ؟ ادري انو لازم اجرب واذوق بس انا ابغا رايك الشخصي في نكهة الثوم ابمعمر مناسبة ولا لأ وجزاك الله خير
أعتقد إيه بس مدري جربي وذوقي مالك إلا كذا
اوكي ، طيب الي كان تحت الدجاج هو الماشد بوتيتو الخضرا ؟ واذا ايوا فالكراث الي مستخدمه هل هو الكراث الي عندنا في السعودية ولا المستورد ؟
إيه هو الماشد بوتيتو الأخضر. كل الإثنين ينفعون زي ماكتب في الوصفه حقت الماشد بوتيتو أي أي أعشاب تنفع.
ممكن طريقة تجفيف الجزر
والف شكر
بتحتاجين مكينة تجفيف و فيتامين سي أو كبريت عشان تجففينه صح. إذا كنتي تبين تجففينها عشان وصفه أنصحك تشرينه مجفف جاهز أسهل.
طيب عطني مثال استحدام لكرد اليمون ابي اسويه بنوع حلويات غير هالتارت عطني افكار ومشكور والمعدره ع الاطاله
قدمية كصوص مع أي كيك أو حطيه فوق تشيز كيك مثلا أو بانا كوتا أو صبيه فوق بانكيك أو وافل أو فرينش توست.
السلام جربتتارت الليمون بالميرانج وكان روعه وحبيت كرد الليمون طعمه جمييييل عشقته سؤالي كالتالي الميرانج بعد كم ساعه صار طري ماادري ليه ؟وولوبسويها ثانيه ابي تغطيه غير الميرانج ماادري وش يناسب الليمون ؟وش ممكن استخدم الكرد فيه غير هالفطيره ماعندي خبره وجزاك الله خير
وعليكم السلام و الرحمة ..
أقري موضوع المرانج الفرنسي و المرانق السويسري في المدونة شرحت فيهم كل كل كل شي متعلق في المرانق.
منتب ملزمة تحطين تغطيه على التارت. سر التارت هذي في المرانج كونه يشيل شوي من الحموضه و الحلاوة الزايدة اللي في الكرد ويعطي تضاد حلو في النكهة و القوام وخصوصا مع الحرق في الآخير بس محد قال إنه ضروري أو لازم ينوكل مع شي فوقه .
الكرد ممكن يستخدم كحشوة أو صوص سواء مع أكل مالح أو حلو أو حتى تدهنين فيه توست مع الفطور.
مرحبـــــا شيف ..
شفت ببرنامج الماستر شيف وحدة عاملة بيض مسلوق محشي بالصفار مع توابل عجبت الحكام مرررة .. اعتقد التوابل كانت ايطالية .. كان شكلها يشهي مع اني ما أحب هذي الشغلات وكنت أعتبرها خرابيط <<< لحد يزعل
بس صراحة كبرت في عيني بعد ما شفت الحكام يثنو عليها .. ما بدي تقولي ايش مكوناتها .. هذي المقدمة كلها عشان بدي وصفات مجربة للبيض المحشي إذا عندك
بيض محشي ؟ قصدك بيض مسلوق اللي يجيك لين أو اللي يسمونه poached egg ولا قصدك اللي يكون مفرغ ومخلوط مع الصفار أشياء ثانيه أو اللي يسمونه deviled eggs
يعني زي هذا :
ولا هذا :
طيب بالنسبة للتاني ممكن اقتراحات لتبهيره ؟ وكيف نحافظ على لونه ومايسود؟
بهريه بأي شي تبين بس كونه بيض خفي يدك لا تحطين ألف شي. أسلقي البيض بعدين شيلي الصفار و أخلطي معه مايونيز و أي شي ثاني تبين وأرجعي رصيه في البياض من جديد. ملح وفلفل أبيض و شوي كراث تكفي بس تقدرين تحطين أي شي ثاني تبين.
مساء الخير
سؤالي عن التبنياكي هو طريقة طبخ ياباني ولا صيني ولاتايلندي ولاعندهم كلهم
اشوف العالم تقلي دجاج ولاغيرة وتحط صلصة حمراء ويقولون تبنياكي
هو بالظبط ايش؟ واذاكان صح وشهي الصلصة الخاصة فيه ؟
وجزاك الله خير
مساء النور …
التبنياكي طريقة طبخ يابانيه وتعني حرفيا مطبوخ عالصاج. تابان يعني حديده أو صاج و ياكي يعني مشوي بالياباني يعني مشوي عالصاج أو الحديد. في التبانياكي الطباخ يطبخ الأكل قدام الزباين على صاج حار ويسوي حركات وهو يطبخه، لو رحتي مطعم بنيهانا في جده (مدري وين في الرياض) هذا هو التبانياكي. التابانياكي إختراع ياباني بس هو مصمم للسياح أكثر وما يقدم الأكل الياباني الأصلي وعشان كذا بتلاقين عندهم أشياء مأخوذه من الأكل الفرنسي أو الصيني أو غيرها بس هو عموما طريقة طبخ يابانيه.
غير الناس بتلاقين مطاعم تسوي هذا الشي (هذا طبعا يدلك على مستوى المطاعم عندنا) ويقدملك أكلات على أساس إنها وجبة إسمها تبانياكي بس غالبا يكون إنهم محتارين في التسميه ويعطونها هذا الإسم بس حطي في راسك إن مافيه أكله بهذا الإسم.
مرحبا شيف
مطعم لا كوزين الي ذكرته مرة هو نفسه زودياك لاكوزين ؟ الي ورا تشيليز ؟
لا هو حولين تشيليز بس موب زودياك اللي في السطح هذاك مقابل له علطول يعني عالجهة الثانيه من شارع فلسطين و إسمه لاكوزين بس. يعني و أنتي ماسكة شارع فلسطين متجهة للبحر بيجيك تشيليز على يسارك أمشي شوي وبتلاقين مطعم عاليمين هو هذا.
مشكور وعساك عالقوة ,,
انا شفت الموضوع هنا وعلى بالي نفس اللي بنتدى شمواه
بس الظاهر انك زدت عليه معلومات ,,
متحمسه ارجع اجربه واتفادى كل اخطائي ,, ألف ألف شكرا
والله يعطيك كل ما تتمنى ويوصلك لاعلى المراتب يا رب
السلام عليكم
كيف الحال ,ممكن طريقة تشيز كيك الفرولة بحثت في المدونة لقيت بس القرع والاريو ولو تعطيني طريقة تشيز كيك وانا اتحكم بالتغطية فرولة او توت او كرز
وعندي سؤال في بعض الوصفات كاتب انو درجة حرارة الفرن تكون 300 او 350 يعني نخلي مقياس الحراره داخل الفرن الي ماتوصل لهذي الدرجة او لما نفتح الفرن نخلي الحرارة علي 300 ونستي شوية وبعدين ندخل الصينية
والسؤال الثاني في بعض وصفات الكيك في المقادير البهار الحلو زي كيكة التفاح والجزر وين ممكن القاه لاني دورت في السوبر ماركت ومالقيت وايش ممكن احط بديل
ومشكور والله يجزاك خير
وعليكم السلام …
سألتيني سؤال التشيز كيك من كم يوم وجابوتك وعطيتك رابط الموضوع.
الفرن المفروض الإثنين يعطون نفس النتيجة. الحين إحنا إذا حطينا الفرن على ٣٠٠ وشغلناه وش معنى هذا الكلام ؟ معنى هذا الكلام إن الفرن بيرتفع حرارته إلين توصل ٣٠٠ بعدين يوقف ويبدأ يبرد ويسخن حولين ال ٣٠٠ هذي بالضبط زي المكيفات كيف تفصل وتشتغل. اللي يصير إنه مع الوقت وحسب جودة الفرن الأفران تبدأ تخرف ، فنكون حاطينه على ٣٠٠ بس هو يوصل ٣٥٠ مثلا أو يكون واصل ٢٥٠ مثلا يعني أبرد أو أحر من المفروض فعشان كذا نستخدم الميزان عشان نعرف كم الحراره الفعلية داخل.
البهار الحلو مدري وين تلاقينه بس أكيد موجود عند العطارين. مافيه شي بيعطي نففففس الطعم بالضبط بس هو نكهتة تقريبا تقريبا قريبة من القرفة و جوزة الطيب و القرنفل وتقدرين تسوين شي يشبهه بإنك تخلطين الثلاثة بكميات متساوية (مافيه بديل للبدائل عاد )
يعطيك العافية وش الفرق بين المطازيز والمرقوق
ربي يوفقك ويسعدك
كلهم نفس المرق ، الفرق هو إن المطازيز عجين مدور صغار و المرقوق عجين بس كبير مره. بعض الناس يحطون على المرقوق بصل مع مسمنة بس ما يحطونها على المطازيز.
السلام عليكم
سؤال اخير 😀
بسوي التشيز كيك ، ولا لقيت ساور كريم واخذت لبنه
سؤالي
الساور كريم كم غرام ؟ عشان ااوزن اللبنه
والف شكر لك
ما أعرف حطي زي ماكتبت في الموضوع
سلاام لشيفنا المبدع
انا عندي عزومة عشاء وناوية اسوي كباب دجاج
وودي لو اقدمه مع صوص جانبي .. وش رايك وش انسب صوص يتقدم مع الكباب؟
ولك جزيل الشكر والعرفان
تقدرين تسوين طحينه ، ثوم ، مايونيز بملايين النكهات ، زبادي بالثوم و الأعشاب يمديك حتى تسوين صوصات ثانيه شوي بعيدة عن العربيه زي تشتني المنجا أو الأناناس أو حتى باربيكيو أو بيستو.
السلام عليكم شيف مشكوووووووور علي المدونة يجزاك ربنا كل خير ويوفقك لي شهر ادور علي مدونتك في قوقل هههههههه لين لقيتها الحمد لله كنت اتابعك في شمواه جربت البيتزا طلعت ممتاااااااازة الحمد لله ابسال عن واحة طباخة اسمها رشة عطر من عالم حواء يمكن تكون شفت وصفاتها هي مختفية انا قلت يمكن مسوية مدونة يا ليت لو اي احد يعرف لها عنوان والسوال موجه للزوار بعد وشكرا.
مرحبا..
جففت طماطم بالشمس وبعضه حطيته بزيت زيتون والباقي بدون شي.. ابغى اسوي خبز النخالة بالطماطم ..سؤالي:انقع الطماطم لين يلين واقطعه ولا اقطعه وهو ناشف واضيف للمقادير؟
قطعي اللي حطيتيه في الزيت
تفضل الرابط الدقيقة 2,35
ولو بالتقدير قد ايش نحط جيلاتين للمويه او السفن آب عشان يكون زي ثقله ..وشكرا
هذا إعلان لصبغة صناعية ؟ موب شي تسوينه في البيت ؟
هلا شيف ايش اخبارك ان شاء الله تمام
شيف حبيت اسئل على طريقة البودينج الى بالبريوش وما عليك امر
مشكور
هلا والله ..
تلاقين موضوعين واحد حق بودنج الخبز و الثاني حق البان بردو آخر موضوع نزلته كلهم ينفعون بالبريوش.
السلام عليكم ورحمة الله وبركاته ..
أبي بالاول اظهر اعجابي وفخري فيك كرجل خليجي ما شاء الله
مبدع , واطمح أكون مثلك , أحب فيك الدقه وامانة الطرح
يستحيل الواحد يجرب وصفه منك ويحتار لانك مغطي جميع جوانب الوصفه .
تبارك الرحمن , الله يحفظك
سؤالي يا المبدع بخصوص المكرون ,
بصراحه ناويه عليه نيه , لان اغلب اللي اكله فالطاعم ماله نكهه ولا طعم
وأساسا انا ابي اتقن المكرون ,
سويت وصفت المكرون اللي في موضوع منتدى شمواه
واستبدلت اللوز بالفستق , أنا طاحنته بالبيت وبعدها سويته مثل البيستاشيو بتر
وبعدها نخلته مع السكر المطحون وصار نااااعم مثل الجاهز ,,
المهم اني كملت الخطوات نفسها لكني لاحظت من البداية ان البيض نفش بسرررعه
وصار كانه قطعة اسفنج ما كانه ميرانغ
وحتى وانا اصب المكرون حسيت انه متماسك زياده عن اللزوم
بعدها ما طلعت القبه قلت مو مشكله الطعم يكفي
لكن لما برد المكرون بدا يتكسر وهش بزياااده ما اقدر امسكه بيدي حتى
وفيه هوا كثيير .
لكن الطعم خوووورااااافي . عشان كيذا ابي اعرف وين غلطت
واعيد اجرب الوصفه , وما عندي اشكاليها لو حتى اجبها 10 مرات بس تظبط
والف شكر لك ,,~
وعليكم السلام و الرحمة …
في الفستق نطحنه بس مانخليه يصير زبده ! حتى لو نخلتيه من جديد مع سكر تركيبه أختلف وفصل الدهن فيه بسبب حرارة الخلاط وعشان كذا قلت كثييييير ما نطحنه أكثر من اللازم.
أقري موضوع الماكرون اللي في المدونة هنا وبتعرفين وين غلطتي بالضبط حطيت في الموضوع كل كل كل شي.
السلام عليكم شيف
انا تبع الميزان الحراري
انا اسفه ماوضحت لك اللي اقصده وقت القلي …مو الطبخ كمان البطاط
واشكرك ,…
وعليكم السلام …
أهااا كان قلتي ميزان زيت. الدجاج تقلينه من ٣٤٠ – ٣٧٥ حسب حجم الدجاجه والوقت المطلوب لطبخها. كل ما صغرت القطعه أو أحتاجت وقت طبخ أقل تزيدين الحراره و العكس صحيح. يعني لو بتسوين تشكن نجت مثلا تقلينه على ٣٧٥ لأنه يستوي بسرعه بس لو بتقلين فخذ دجاجه كامل بالعظم تحتاجين وقت طبخ طويل وعشان كذا تحتاجين حراره أقل فتقلينه على ٣٤٠ وكذا …
البطاطس يبيلك تقلينه مرتين على حرارتين مختلفه المره الأولى على حراره ٢٨٠-٣٢٠ و المره الثانيه على حراره عاليه يعني ٣٦٠-٣٨٠.
موضوع القلي يطول وصعب جدا جدا أشرح كل شي هنا بالتفصيل بس أوعدك إن شاء الله له موضوع خاص فيه ومفصل بعد.
مرحبا شيف
ممكن اذا سمحت تشيز كيك القرع مالقيته في المدونه
احولت عيني وانا ادور
فيه مربع بحث فوق عاليسار أكتبي تشيز كيك ويطلع.
الببايا تكون برز بسمتي او مصري او امريكي؟
لا هذا ولا هذا ولا هذا … تكون برز أسباني متوسط الحبة أو رز ريزوتو إيطالي بعد متوسط الحبة. نوعية الرز من أساسيات نجاح البايييا مافيها تبديل أو لعب.
طيب ايش يفرق الاسباني عن الاسترالي الصنوايت
الشرح يطول في الفروقات بين أنواع الرز بس كل اللي لازم تعرفينه إن الطعم و القوام وكيف يشرب السائل اللي حولينه يختلف.
صباح الخير شيف
كيف طريقة الجيلاتين اللي يغطون فيه الحلويات الصغيرة الباردة زي الموس مثلا؟(يكون الجيلاتين عادي شفاف أو بصبغة وبدون كريمة)
والله ما عرفت اللي تصدين وريني شكله لو عندك
السلام عليكم ،،
مشكور ما قصرت ،،
بالنسبه للتشيز كيك..
تقول ( بعد ما تستوي التشيز كيك طفي الفرن و أفتحي الباب دقيقة و بعدين صكي الباب وخليها في الفرن ساعة عشان تكمل طبخ .)
يعني اطبخه لين تستوي و تصير من الوسط تهتز خفيف.. واطفي الفرن ،اخليها زياده ساعه ؟!
طيب اخاف تتعدى مرحله الاستواء و تخرب،، !
وليش اخليها بالفرن ساعه بدون نار ؟ مستغربه هالحركه ..
اتذكر سويت تشيز وزي كلاممك يوم شفتها تهتز طلعتها ، ما دريت انه فيه خطوه ثانيه
و كم مقاس صينيتك ٩ انش ولا كم ؟
وشكرا
أنتي طلبتي الطريقة هذي بالذات ، أنا دايما دايما أقول سووا زي حقت القرع بس بدون القرع وقلت إني راح أنزل الطريقة من جديد بشكل أحسن.
بالضبط بعد ما تستوي سويي كذا وماراح تستوي أكثر من اللازم لأننا بردنا الفرن. يمديك تتركين هذي الخطوة هي موب ضروريه ضرورية بس إحتياط لا أكثر.
الهدف من حطتها في الفرن هي إنها ما تبرد بسرعه وتنشق ، إذا سوينا كذا إحنا نبردها شوي شوي.
المقاس ٩ إنش.
لو تكرمت ابغى طريقة البصل اللي ينحط فوق الجريش بالتفصيل
متحطمة كل مااسويه يصير يتمطط مايقرمش
والف شكر لك
تقطعين بصل نحاف ، بعدين تقلينه في زيت حار إلين يقرمش. لو الزيت حار أكثر من اللازم أو مقطع كبار بينحرق من برا قبل ينشف تماما من داخل وهذا بيخليه رطب أو محروق. ولو كان الزيت بارد مره بيشرب البصل زيت كثير وقت كافي إلين ينشف.
this is so professional !
MASHALAH
may god bless you
and i have a question….maybe its a stupid one after what i have seen so far!
?? Do you know how to make creme brulee
شكرا …
فيه طريقة كريم بروليه بس مانزلتها هنا لسا منزلها في منتدى من زمان.
http://msa6el.mbc.net/vb/tt68278.html
السلام عليكم ,,
مساك الله بالرضا والعافيه .,,
شيف شفتلك طريقة للماكرون غريبه شوي عن اللي انت كاتبها ,,
هذا الفيديو تبعها >>
مع اني ما ادري شنو المقادير بالضبط بس اعجبتني الطريقه وخاصه انه حركه اللين قال بس يعني ماخاف ان الهوا يطلع << هذا اكثر شي عاجبها ^ـ^
طريقة المرانغ تبعه ذكرني بالنوغة !!..
شرايك اقدر اسويها بنفس مقاديرك والا كيف ؟؟..
وعليكم السلام و الرحمة …
قبل كل شي طريقة الماكرون في أي أي أي أي أي أي أي أي مكان وحدة فهذي موب طريقة غير. لو قريتي الموضوع وبالذات النقطة ٢ في الخطوات بتعرفين وش أقصد. الفرق الوحيد إنه أستخدم هنا مرانج إيطالي ، ليش أستخدمه وكيف بيفرق أجوبتها موجودة في الموضوع.
حركي المرانج بسرعه ما عندك مشكلة في أي طريقة تستخدمين يمديك تحركين بسرعه بس حطي في بالك نقطة مهمة وهي إن فيه نقطه بالضبط عندها يكون الخليط جاهز. لو خلطتي أكثر من اللازم مافيه رجعة ، لو خلطتي أقل من اللازم يمديك تخلطين أكثر. هو صح يبان إنه يخلط بقوه وبدون ما يهتم بس عينه تعرف متى يوقف ولو قريتي وصفته أو سمعتي وش يقول بتعرفين إنه ما يقول أخلطي على عماها.
يمديك تسوين طريقتي بمرانج إيطالي لو تبين أو سويي طريقته بعد كلها نفس الشي بس أعرفي إن الخلط في كل الطرق له وزنيه موب إعتباطي.
سلام عليكم ..
بالنسبه للوك انا اشتريت وحده من ساكو ثقيله … وكان عليها طبقه سوداء عازله … وبعد استخدامين تخدش جزاء منها وصار يصدي بسرعه … وكرهتها وكنت راح ارميها …
بس سمعت كلامك هنا وتراجعت … طيب كيف اعتني فيها جزاك الله خير …
إذا تخدشت ما أدري ؟ الووك الحديد ما تنخدش ولا عليها طبقة حماية يكون شكلها زي كذا :
تعتنين فيها بإنك تنشفينها زين بعد كل إستخدام وبسرعه.
السلام عليكم
كيف الحال؟
آخوي وين القى وصفه التشيز كيك العادي ، بحثت لقيت القرع و الاوريو
وشكرا لك
هنا بس بنزلها في المدونة بوصفة ثانيه إن شاء الله .
http://msa6el.mbc.net/vb/tt67941.html
صبح الخير
ايش يفرق لحم البقر العادي عن انجوس بيف
بذكر الوك شريت واحد لمن اغسلة ومانشفة على طول يطلع علية نقاط صدأ مع انة ثقيل معناة هذا نوعية سيئة ولا
جزاك الله خير
الآنجس بيف يجي من فصيلة بقر الآنجس بس. إذا تبين أسهلك إياها كلمة آنجس مصممة عشان تسحب الفلوس من جيب الزباين لا أكثر هي ما تعني بالضرورة لحم أفضل بس هي تعني أكييييد لحم أغلى. كلمة آنجس صارت مع الوقت طريقة تسويق عشان يخدعون الناس إنهم يوفرون الجوده بس موب بالضرورة هذا الشي صحيح و الدليل إن حتى مطاعم زي ماك صارت تقدم لحم آنجس !! فصيلة البقر صح تفرق بس كون البقرة من فصيلة معينه ما يعني بالضروره إن لحمها جيد دايما وعشان كذا هي كلمة خداعة. إذا تبين تشوفين الجودة دوري على تصنيف اللحم من وزارة الزراعة الأمريكية هذا اللي صدق بيسوي كل الفرق. تصنيفات اللحم هي : برايم prime وهو أحسن نوعية لحم و أغلاها وبعده يجي التشويس choice وبعده يجي السيليكت select و أي واحد يبيعك لحم محترم بيكتبلك تصنيف اللحم حقه.
الوك اللي يصدي هذا غالبا من حديد كربون وهو أفضل شي هنا بس يحتاج عنايه.
بسال عن الووك ايه افضل نوع لقيت نوع اسود في اكيا ب 19 ريال
ونوع رصاصي فاتح بس مش عارفه ايه مادته في كارفور
ايهما افضل؟
سؤال تاني عنطريقه تحضير الباستا نفسها
انا دورت في مواقع اجنبيه عن طريقه بدون بيض
عملتها من السميد القاسي بس كانت تقيله موووووووووت علي المعده بس الطعم روعه
فجربت و عملتها زي الشيف ماريو بيتالي النصف للنصف دقيق و سميد
حلوه ومش تقيله بس الطعم اقل ايه رايك افضل طريقه شرط تكون بدون بيض و ياريت وصفات للرافيولي
والله ما أعرف كل شي في إيكيا صعب أعرف من هنا.
الووك أحسن شي اللي تكون من حديد كربوني وتكون غالبا ثقيلة شوي بس جدا رخيصة.
الباستا فيه موضوع خاص عن الباستا تكلمت فيه عن كل شي أعرفه عن الباستا. و الرافيولي و الباستات المحشيه تكلمت عنها بشكل موسع في الموضوع.
السلام عليكم
كيف الحال ياشيف
انا شريت الميزان الحراري ….السؤال :
الدجاج كم درجه الحراره الممتازه بحيث يستوي بدون مايحترق ؟
ككان البطاط …
شكرا
وعليكم السلام و الرحمة ..
الدجاج ينطبخ إلين توصل حرارة أسمك جزأ في الفخذ ١٦٥ فهرنهايت. الفخذ آخر شي يستوي وعشان كذا هو الجزأ اللي نقيس حرارته. أقل من ١٦٥ الدجاج رطب صح بس شبه ني وهذا فيه خطر تسمم وعشان كذا نطبخه ل ١٦٥ ، أكثر من ١٦٥ يبدأ ينشف وعشان كذا مهم توقفين الطبخ عند ١٦٥ عشان تتجنبين إنك تنشفين الدجاج أكثر من اللازم.
هي اسمها شاينيز نودلز مكرونه صينيه بالخضار والله دورت بالانجلش بقوقل واليوتيوب وشفت وقريت كل الريسيبي وماوصلت للطعم مره شفتك منزل نودلز وفيها فول سوداني ابسويها وابشوف ممكن تكون قريب 😦
عموما شكرا
شاينيز نوودلز ما تعني شي ؟ زي اللي يدخل مطعم إيطالي ويقول عطني باستا إيطاليه ؟ قصدي بإسم الأكله وش إسمها الحقيقي أو عالأقل وصفها من المينيو لو كانت موجوده.
بمطار جنيف ذقت الذ شاينيز نودلز بحياتي وحاولت اتطعم كانت نكهة السمسم مررره قويه والصوص اللي حطه على النودلز كان اسود فوش تتوقع الصوص جربت بالصويا صوص وزيت السمسم ماظبط حاولت وعدلت وماصلت للنكهه اللي ذفتها هناك تحسفت اني ماسألته لدرجة اني شكيت ان فيها كحول ولا وش هالطعم العجيب اللي ماعرفته؟؟
هههه بدون إسم الأكله الأصلي وبدون ما أذوق الطبق وشلون أعرف ؟
السلام عليكم
اخوي ابطلب منك طريقة كيكة الفراوله زي المحلات بالاخص القباني تجي مررره اسفنجيه وجوسي وخفيفه هل هي كيكة الانجل كيك ومشربه شيره او موية اناناس ؟؟ وكيف اسوي الاطراف اللي هي كيك ملصق فيه اللوز المبشور؟؟؟؟
ومشكوووره مقدما
وعليكم السلام و الرحمة ..
ما أعرف الصراحة القباني ولا أعرف الكيك اللي تقصدين بالضبط بالضبط بس فيه طريقة كب كيك فراوله في صفحة الوصفات لو تبين.
إذا تقصدين كيك الفراولة اللي تكون كلها بيضاء هذي جدا سهلة ، سويي كيك أبيض أو أي كيك ثاني تبين بس كيك أبيض عشان اللون ، تقدرين تستخدمين خليط كيك جاهز لو تبين . بعد ما تسوين الكيك خليه يبرد زييييييين ، بعد ما يبرد أقسمي الكيك نصين وأحشيها بكريمة مخفوقه مثبتة و قطع فراولة وزينيها بكريمة مخفوقه مثبتة (تلاقين وصفتها في موضوع الكريمة المخفوقه في المدونة) وبس هذي الكيكة.
الأطراف تسوينها بإنك تلصقين على الجوانب لوز مطحون بعد ما تزينينها بالكريمة علطول.
فيه مليون طريقة يمديك تسوين كيكة فراولة بس هذي هي اللي يسوون في المحلات و المخابز عندنا.
السلام عليكم
ممكن طريقة الدجاج بالزبدة (ايدام هندي ) ؟؟
أوراق الكاري اذا تعرف وين ألقاها بجده ؟؟ دورتها ومالقيتها
شاكره لك
وعليكم السلام و الرحمة …
الدجاج بالزبدة بنزل الطريقة إن شاء الله إذا نزلت طريقة دجاج التكا ، هو يتسوى بدجاج تكا وبعدين ينطبخ في صوص.
أوراق الكاري شفتها في مرحبا و الراية و الدانوب.
الله يعافيك انا اموووت على شي اسمه كبه فأبي طريقتها منك وبذوقك وابيها بلحم عجل لأن زوجي ماياكل الغنم وحلاة الكبه بلحم ماأحبها بالدجاج ممكن طريقتها الله يرضى عليك
معرفتي فيها جدا بسيطة والله
سلاام شيفنا
توني قريت موضوعك حق المارينج..
وحبيت أسأل سؤال واستحملني اذا كان سؤالي مكرر الله يرضى عليك..
فيه طريقة تيرامسو صفار البيض ينبطخ في حمام مائي .. وبياض البيض بنعمل منه مارينج عادي وينخلط مع الجبن والكريمه وصفار البيض.. يعني يكون مش مطبوخ
فأنا بس بتاكد هل مافيه ضرر تسمم .. لأن التيرامسو رح يقعد في الثلاجه من 3 لاربع ايام ..
شاكرين تعاونك معنا ..
الخوف من البيض يكون في حالتين. يا إن الصفار حق البيض يكون ملوث بإنه يتلوث من البكتيريا اللي في الدجاج نفسه وهنا لو أكلناه ني ممكن نمرض بس لو أنطبخ تموت أغلب البكتيريا اللي فيه. الحالة الثانية هي إن البكتيريا تعيش عليه بعد ما نكسر البيضه ، كون الصفار وسط جدا جدا مغذي ومناسب للحياة سهل يتلوث بسرعه وهذي نقدر نتجنبها بإننا نبرد البيض ومنتجاته.
البياض ما تتكاثر عليه البكتيريا وعشان كذا هو آمن.
مساء الخير شيف …
هل الحراره المنخفضه في الفرن عند انضاج الكيك ممكن تتسبب في هبوط الكيك …مثلا لو دخلنا الكيك على حراره 160 بدلا عن 180 … لانه حصلت معي مرتين مره كب كيك ومره كيك …
مساء الخير شيف …
هل الحراره المنخفضه في الفرن عند انضاج الكيك ممكن تتسبب في هبوط الكيك …مثلا لو دخلنا الكيك على حراره 160 بدلا عن 180 …
مساء النور ..
ممكن وعشان كذا في الكيك أو أي معجنات أختاري وصفه من شخص ثقة وأمشي على الخطوات بالضبط بدون أي تحريف.
سمعت مره بس مادري من وين انه في الكيك اول لازم نحطه على فرن مسخن قبل على 180 مده عشر دقائق وبعدين نخفض على 160 حتى تكمل سوا … علشان ينضج وتحميرته حلوه …
إذا كنتي قد جربتي الوصفه عند أحد ثاني أو واثقه في ذوق صاحب الوصفه فليش تسوين شي زي كذا ؟ إذا كنتي عارفه إن النتيجة لو مشيتي على الوصفه بتكون حلوه ليش تغيرين فيها ؟ جربيها أول شي زي ماهي مكتوبه وبعدين شوفي فيها مشاكل ولا لأ وكيف تحلينها.
في الطبخ راح تلاقين آلاف إذا ماكان ملايين الإشاعات و النصايح ، أكتبي في جوجل نصايح طبخ أو cooking tips وشوفي وش تلاقين. في المعجنات حطيها قاااااااعدة أمشي على الوصفه بعدين حلي مشاكلك.
حسب نسبة المويه و السكر و الطحين في العجينة بتختلف حرارة وفترة الطبخ وعشان كذا مهم إنك تسوين زي ماهو مكتوب أول.
السلام عليكم:
موقعكم رائع جدا”….شكرا” لكم
بس لو سمحتوا أريد طريقة عمل أصابع الرقائق بالدجاج والجبن والصوص
وعليكم السلام و الرحمة …
وشي أصابع الرقائق ؟
السلام عليكم شيف
ممكن طريقه السويدش ميت بولز ؟
انا مسويه كميه من الميت بولز اللي انت حاط طريقتها و مفرزنتها
فابي بس طريقه الصوص اذا ممكن و شكرا
وعليكم السلام و الرحمة …
ينفع تسوينها بالميت بوولز اللي حاط بس الأصل تنكهينها بنكهات سويديه زي جوزة الطيب وزنجبيل و كاراويه و بهار حلو و شبت.
الصوص تسوينه بعد ما تطبخين الميت بوولز شيليهم في صحن عالجنب ونزلي الحراره بعدين حطي ربع كوب طحين على الزيت اللي باقي و حركيه معهم إلين يتشقر شوي (يعني نسوي رو بس بالدهن اللي نزل بدال زبدة) بعدين ضيفي على الرو ٣ أكواب مرق بقر غامق (تلاقين موضوع المرق في المدونة) و أطبخيها معها شوي إلين يختفي طعم الطحين بعدين ضيفي عليها شوي قشطة خفق عشان تدسمينها زياده وآخر شي قطعي على الصوص شوي شبت وبس.
صبآح آلخيير شيف .. آو ع مَ آتوقع آسمك خآلد اذآ مو غلطانه
آني وآيز ..
آذكر مره قلت إنك تطلب من آلنت آعوآد آلفآنيلآ .. سؤآلي نسبة كم بآلمية ممكن تجي مغشوشة ؟؟
ممكن آعرف من وين إنت تطلبهآ ؟!
آنآ شفت ب ebay & amazon
ووو ثآني شي .. لقيت معلومة آليوم
To give your cake a nice rounded top instead of a humped top, after pouring the batter in the pan, make a slight hollow in the middle of the batter
طيب آذآ آلخلييط سآئل ؟؟ كيف بعمل آلتجوف ؟
و بس D:
هلا والله ..
ماقد طلبت وجتني مغشوشة ، إذا جيتي للصراحة ماقد طلبت شي من النت وجاني مغشوش. الشراء من النت صار زي الشراء من المحلات بالضبط الحين وكل محل عالنت يعطيك ضمانات ترجيع فلا تخافين.
ما أعرف الصراحة المعلومه جديده علي وصراحة ماقد شفتها حتى عند أكبر أكبر محترفين الكيك ؟ كلهم يقصون القبة اللي تطلع وبس ؟ جربي وقوليلي إذا ضبطت.
ممكن طريقة المعصوب
شوفي هنا :
http://www.ksayat.com/showthread.php?t=124507
ويمديك تبدلين خبز بسكوت أو تميس لو ما تبين تعجنين
مشكور على التوضيح..بس من خلال ردك
تبادرلي سؤالين: 1-وش هي كريمة بافاريه؟؟
أول مرة أسمع فيها و دورت عليها في جوجل
بس لاحظت إنها تشبه الكريم باستري!!
صح أو أنا غلطانة؟؟
2- ممكن أفكار للحشوات المالحة للأكلير؟
جزاك الله خيرا على ما تقدمه
الكريمة البافاريه كريمة أو حليب مثقلة بجيلاتين موب نشا وبروتين بيض زي الباتسييه وأحيانا مخففة بكريمة مخفوقه.
حشوات مالحة يمديك تحشينها سلطات ، موس مالح مثل موس ربيان أو موس جزر أو موس كبدة دجاج ، تقدرين تحشينها قبل التقديم علطول بأي نوع يخنات أو لحم مطبوخ وقت طويل ، هذي بعض الأمثله بس فيه كثير أحس.