حشوة البنجر و الريكوتا .. Beet Root and Ricotta Filling
هلا والله …
أغلب الناس يعرفون البنجر بصورته المخلله بس وكثير ناس ماقد ذاقه طازج مع إنه جدا لذيذ وله إستخدامات كثيره مره و أشوفه واحد من الخضروات المظلومه. إذا جيتوا تختارون بنجر أختاروا البنجر اللي يجي قاسي ويكون قشره مشدود نسبيا يعني ما يكون الجلد لين لأن هذا دليل إنه قديم.
المكونات :
حبة بنجر كبيره أو حبتين صغار
٣/٤ كوب جبن ريكواتتا ( أو أي جبن أبيض طازج ثاني .. بس أنصح بالريكوتا هنا )
ملعقتين كبار بقسماط
جبن بارمزان
ملح وفلفل
رشة خل بلسمك
![بنجر beets](https://i0.wp.com/www.faqs.org/photo-dict/photofiles/list/2091/2736beet_root.jpg)
هذا البنجر
الطريقة :
أول شي بنسويه إننا نطبخ البنجر .. نغلف البنجر بقصدير مع رشة ملح وفلفل وشوي زيت زيتون وندخله فرن ٤٠٠ ونخليه إلين يستوي .. نعرف إنه أستوى بإننا ندخل سكين وإذا دخلت بسهولة يعني أستوى ، بياخذ تقريبا ساعة .
الحين نطلعه من الفرن ونفك القصدير بعدين نفركه بيدنا عشان نقشره وبنلاقي القشر طاح بسهولة ( يفضل تلبسون قفاز هنا كون البنجر بيلون يدكم أحمر ) . الحين البنجر جاهز ويمديكم تحفظونه كذا أسبوع في الثلاجه.
الحين نبشر البنجر بمبشره عاديه بعدين نخلطه مع باقي المقادير ونذوق الطعم ونعدل حسب الرغبة …
وبس هذي الحشوة جاهزة …
أنولوتتي بحشوة البنجر و الريكوتا مع صوص الزبدة .. Beet Root Agnolotti with Poppy Seed Butter Sauce :
نسوي عجينة الباستا زي ما شرحت في موضوع الباستا هنا وهنا ..
الحين نسوي حشوة البنجر اللي فوق ونحشيها في الباستا بالشكل اللي نحب ..
الحين نطبخ الباستا زي ما شرحت في الموضوع بعدين نسوي الصوص ..
عشان الصوص نذوب زبده ( تقريبا أصبع ونص ) على حراره وسط وبعد ما تذوب نحط ملعقة كبيره بذور خشخاش poppy seed وبس هذا الصوص .. نحط الباستا عليها بعدين نرش بارميزان.
التعليقات مغلقة.
البنجر كونه بينلف في قصدير بيصير مطبوخ بالبخار فليه ماأقصر سالفة الفرن واطبخه بالبخار على النار من أعلى أوفر طاقة ووقت فرن كبير على حبتين بنجر وتاليتها طبخ بخار مشكور عسى الجنة مثواك غيرت جونا في الطبخ
يمديك ، ويمديك تسلقينه أو تشوينه بعد لو تبين .. أهم شي تخلينه لين هذا اللي يهمني الطريقة راجعتلك .. بالنسبه لأوفر طاقه ما أعتقد ، هو راح ياخذ نفس فترة الطبخ سواء طبختيه على البخار مباشره أو في قصدير ..
تسلم يدينك شيف ..
ما قد تجرأت على استخدام البنجر ابداااًًً ..
بس بعد كلامك راح اجربه باذن الله ..
حفظك المولى ..