Skip to content

سينامون روول مع البيكان المسكر .. Cinnamon Rolls with Candied Pecans

29/09/2012

هلا والله …

.

فيه ملايين وملايين الوصفات للسينامون رول بس زي هذي ما أتوقع فيه ! هذي موب زي حقت المحلات، إذا تسوت صح هي تتفوق على أي شي ممكن أحد يشتريه. الوصفة سهلة بس تحتاج شوي شغل وشوي وقت بس النتيجة النهائية تستاهل التعب و أضمنلكم هذا الشي.

.

هذي الوصفة هي للسينامون رول بالمكسرات تقدرون تستخدمون نفس الوصفة بالضبط بنفس الخطوات بالضبط لو بغيتوا تسوونها ساده، بس أتركوا المكسرات و الباقي نفس الشي. أنا أستخدمت هنا بيكان مسكر Candied Pecans لأنه يعطي طعم وقرمشة ما تنوصف مع السينامون رول بس يمديكم تسوونه ببيكان محمص عادي أو أي مكسرات ثانية أو تشكيلة مكسرات.

.

العجينة اللي هنا عجينة جدا دسمة، تقريبا أقرب مالها البريوش ، هي مليانه سكر ودهن وبيض وهذا واحد من أسرار النكهة هنا أرجوا إن محد يحاول يغير شي من راسه. كثير ناس يسوون السينامون روول بأي عجينة مرميه عنده ويشكلها بشكل حلزوني ويسميه سينامون رول و النتيجة دايما مخيبة للآمال !.

.

العجينة هنا تحتاج إنها تقعد يوم في الثلاجة. هذي الخطوة ضرورية عشان تعطي أحسن نكهة. اللي يبي يعرف وش يفرق وليش نسوي كذا يقرأ موضوع البيتزا الإيطالية شرحت هناك الحكمة من قعدة العجينة في الثلاجة.

.

المقادير :

.

للعجينة :

.

٤ صفارات بيض على حرارة الغرفة

بيضة كاملة على حرارة الغرفة

١/٤ كوب سكر

٦ ملاعق كبيرة زبدة مذوبه (تقريبا أصبع إلا ملعقة كبيره)

١٧٠ جرام لبن كامل الدسم على حرارة الغرفة(تقريبا ٣/٤ كوب)

٤ أكواب طحين

ملعقتين صغار خميرة instant yeast

١/٣ ملعقة صغيرة ملح

.

للحشوة :

.

كوب سكر بني (يفضل فاتح)

ملعقتين كبار قرفة يفضل لو مطحونه جديده

رشة ملح

ملعقتين كبار زبدة مذوبة

وصفة من البيكان المسكر أو كوب بيكان عادي محمص

.

التغطية :

.

وصفة من فروستنج الكريم تشيز

.

.

* هذي العجينة جدا متعبة على الخميرة وعشان كذا مهم إن كل شي يكون على حرارة الغرفة عشان تنفش بسهولة.

.

* المقصود باللبن هنا اللبن العادي اللي نعرف يعني المراعي ، الصافي أو غيرهم موب الحليب !

.

* بخصوص القرفة. إسم الأكلة سينامون روول أو سينامون بن Cinnamon Bun يعني خبز القرفة. القرفة هي أهم شي هنا فمهم إننا نستخدم أحسن نوع قرفة موجود إذا نبي أفضل طعم. اللي لاحظته في السوق هو إن أغلب اللي موجود هو نوع قرفة جدا سيء اللي هو الأندونيسي اللي يجي كأنه قشور شجر. طعم هذي القرفة حاد ويميل للحرارة بدون الحلاوة المعروفة عن القرفة. هو جدا قوي لهذي الوصفة برأيي وماراح يعطي طعم ممتاز أبدا. أنا أفضل إني أشتري أعواد قرفة جيدة و أطحنها في البيت لهذي الوصفة ، هذا راح يعطينا أفضل نكهة قرفة ممكنة.

.

Cinnamon

عاليسار القرفة الأندونيسيه وعاليمين قرفة سيلانية ممتازة.

.

الطريقة :

.

للعجينة :

.

في صحن خلط أو في عجانة نخلط صفار البيض مع البيضه و اللبن و السكر و الزبدة إلين يعطوننا خليط متجانس.

.

cinnamon roll.

نحط نص الطحين و نحط الخميرة و الملح ونبدأ نخلط إلين يعطينا عجينة جدا رطبة. نحط الخطاف حق الخبز ونضيف باقي الطحين ماعدا ٣/٤ كوب تقريبا (يمكن نحتاجها يمكن لأ) ونبدأ نعجن على سرعة خفيفة (أو ممكن نعجن باليد) ٥ دقايق تقريبا.

.

بعد ٥ دقايق نشوف العجينة. العجينة مفروض تكون لينة ورطبة بس ما تلصق باليد إذا لمسناها. إذا لقينا العجينة تلصق نزيد شوي طحين ونكمل عجن إلين توصل للمرحلة اللي قلت. نكمل عجن ٥ دقايق زيادة تقريبا بعدين نشيل العجينة من العجانه ونكورها. ندهن صحن بشوي زيت ونحط العجينة فيه ونغطي الصحن بنايلون ونترك العجينة تتخمر على حرارة الغرفة إلين يتضاعف حجمها تقريبا ساعتين إلى ٣ ساعات.

.

Cinnamon roll dough.

ندهن صينية بايركس كبيرة (يعني تقريبا ١٣ في ٩ إنش أو أي شي يكفي إنه يشيل تقريبا ١٠ حبات سينامون رول) بشكل جيد بزبدة.

.

للحشوة :

.

بسكين نقطع البيكان المسكر قطع كبيره.

.

chopped pecans.

في صحن صغير نخلط السكر البني و القرفة و الملح ونخليهم عالجنب إلين نكمل العجينة.

.

نرش الطاولة حقت الشغل بشوي طحين بعدين نحط العجينة عليها. نفرد العجينة بالنشابة بحيث تكون مستطيلة تقريبا. نحاول قدر الإمكان العجينة تكون مستطيلة بعد الفرد لأن هذا بيعطينا قطع مرتبة أكثر. نفرد العجينة بحيث يكون سمكها حوالي ٤-٥ ملليمتر وأبعادها تقريبا ١٨ في ١٢ إنش.

.

Cinnamon roll dough.

الحين ندهن العجينة بشكل جيد بالزبدة الذايبة. نبقي ١ سم تقريبا من الطرف العلوي بدون دهن عشان نلصق العجينة بعدين.

.

نوزع خليط السكر و القرفة فوق الجزأ المدهون من العجينة بالتساوي وبعدين نرش البيكان المقطع فوقهم. نرص الحشوة عالعجينة بيدنا بشكل خفيف عشان تلصق.

.

cinnamon roll dough.

الحين نبدأ نلف العجينة. نبدأ نلف العجينة من الطرف القريب لنا من الوسط بيديين ونحاول نخلي اللفات ضيقة قدر الإمكان.

.

cinnamon roll.

الحين لازم نلصق الفتحة حقت العجينة عشان ما تنفرط علينا. ناخذ الطرف الأخير المفتوح من العجينة ونلصقة بالعجينة نفسها بإننا نضغط عليه بأصابعنا كأننا “نقبصه هههه”. زي الصور تحت.

.

تقفيل عجينة السينامون

العجينة قبل التقفيل

.

closing cinnamon roll

طريقة تلصيق طرف العجينة

.

الحين نشوف العجينة ونحاول نعدل سماكتها بيديننا بحيث تكون كلها تقريبا نفس السماكة.

.

الحين للتقطيع : بإستخدام سكين خبز (شوفوا موضوع سكاكين المطبخ إذا ما تعرفون وشي سكين الخبز) نقطع نهايات العجين (موب شرط بس شكلها موب حلو). نقسم العجينة نصين بالسكين بعدين نقسم كل نص ٥ قطع متساوية السماكة بحيث يكون عندنا ١٠ قطع. ممكن نقطع العجينة إلى ١٢ قطعة لو حابين بس أشوف ١٠ تعطي السماكة المثالية برأيي. نرص القطع على صينية البايركس اللي دهنا أول بعدين نغطي الصينية بنايلون وندخلها الثلاجه طول الليل أو إلى ١٦ ساعة لو نبي.

.

cinnabon rools.

ثاني يوم، نطلع الصينية من الثلاجه ونحطها في فرن بارد. نحط في الرف اللي تحت الصينية صينية ثانيه ونملاها مويه مغليه بعدين نقفل الباب ونترك العجينة نص ساعة تقريبا في البخار. البخار هنا بيسوي شيين أول شي هو بيدفي العجينة وبيرجع الخميره للشغل من جديد. ثاني شي هو بيرطب وجه العجينة وهذا يعني إن الوجه بيكون رطب وماراح يتصلب بسرعه في الفرن وهذا يعني نفشة أكبر في الفرن. هذي النفشة في عمل الخبز يسمونها نفشة الطاولة Bench Proof ووظيفتها تنفش الخبز قبل يدخل الفرن للنفشة الأخيرة اللي يسمونها نفشة الفرن Oven spring.

.

.

بعد نص ساعة نطلع الصياني من الفرن ونشغل الفرن ل ٣٥٠ فهرنهايت.  بنلاحظ إن وجه العجينة جدا رطب وإن العجينة نفشت كثير تقريبا للضعف.

.

cinnamon roll after bench proof

شكل الروول بعد حمام البخار

.

بعد ما يحتر الفرن ندخل الصينية الفرن ونخليها إلين تتلون وتصير ذهبية من الأطراف (يعني موب بس من فوق) بتاخذ تقريبا ٢٥-٣٠ دقيقة. لو عندكم ميزان حرارة فوري هو أفضل شي للتأكد من إستواء الخبز ، طلعوا الصينية بعد ما توصل الحرارة الداخلية ل ١٩٠ فهرنهايت.

.

Checking cinnamon rolls for donness.

الحين و السينامون روول حار ندهن الحبات بالتغطية عشان تذوب وتسيح عالأطراف.

.

Cream Cheese frosting.

أحب أقدم السينامون روول مع زيادة صوص عالجنب أحطه في المايكروييف إلين يصير سايل شوي.

.

سينامون روولز مع البيكان المسكر.

cinnamon rools.

سنامون روول.

.

Follow TopChefCooks on Twitter

Advertisements
57 تعليق
  1. ندى permalink
    17/11/2012 10:44 ص

    يعطيك العافيه شيف .. طيب لو كنسلت خطوة الثلاجة .. وعلى طول خبزت الرولات بيفرق شي؟

    • ندى permalink
      18/11/2012 7:49 ص

      خليتها بالثلاجة 4 ساعات .. والنتيجة كانت مذهله .. مدري كيف لو بمشي على طريقتك بالضبط .. وفيه نقطة ثانيه .. اعترف اني لخبطت في المقادير.. ماكان عندي لبن كامل الدسم .. فاستخدمت حليب كامل الدسم وخلطته بمعلقة كبيرة خل وتركته ربع ساعه .. هل تصرفي صحيح .. ولا خربت الوصفه وكان ممكن تكون الذ من لو اني ما حرفت في المقادير؟ .. والشي الثاني غلطت واستخدمت كوب كامل حليب بدال ثلاث ارباع .. الصراحة ومع هالاغلاط كلها .. الا ان النتيجة كانت ولا اروع

  2. ... permalink
    10/11/2012 6:18 م

    السلام عليكم …
    شيف السكر البني والعادي يكونون مطحونين صح ؟؟

    • 10/11/2012 6:58 م

      وعليكم السلام و الرحمة ….

      إذا الوصفة قالت مطحونين مطحونين … الوصفة صحيحة مافيها خطأ لا تخافين طبقيها زي ماهي مكتوبة.

      • ... permalink
        13/11/2012 12:12 ص

        مرحبا شيف…
        كيف احفظ اعواد القرفة عشان ما تفقد نكهتها ؟

        • 13/11/2012 3:17 ص

          زي أي نوع بهارات … أعداء البهارات هي الحرارة و الأوكسجين و النور بعديهم عنها وأنتي بخير … حطي البهارات في علب تتقفل بإحكام في مكان بعيد عن النور و الحرارة …

  3. ام هشام permalink
    10/11/2012 5:47 ص

    بالنسبة لي انا اعشق الحلويات بجميع انواعها ومنها اترزق الله اسوي في البيت وابيع لان ورايه تسع اشخاص اعيلهم
    جربت طريقتك ولانها مثالية ومعيارية يبغالها وقت ومخمخة ههههههه
    بس بجد اشكرك لانه الزباين انهبلوا عليهاااا الف شكر شيف خالد
    واتمنى ما تحرمنا جديدك دائمااا

    تقبل تحياتي

    • 10/11/2012 12:13 م

      بالعافية على قلبك والله يرزقنا ويرزقك …

  4. ساره permalink
    09/11/2012 1:19 ص

    السلام عليكم

    جربت الطريقة الصراحه شي يفوق الخيال
    طعمها حلوو وهشه

    اكيد راح اجربها مره ثانية وثالثه
    خرعتني من قصة نفش العجينه
    لاني نسيت ما ظلعت البيض واللبن الا متاخر
    غسلتهم بالماي عشان تخف برودتهم
    والحمدلله ما جات ساعتين الا تضاعفت العجينة
    وكل شي كان مضبوط
    يصير اسويها اصغر
    لانها ما شاء الله استوت كل قطعه كبيرة
    حق التقديم احلى حجم صغير

    جزاك الله خيرر
    عنا احنا الحريم
    معاناة في المطبخ ما تخلص
    وصفاتك تعني ابداع

    • 09/11/2012 9:36 م

      وعليكم السلام و الرحمة …

      تفكير سليم … غسيلهم بالماء هي الحركة اللي يستخدم كل الطباخين عشان يوصلون شي لحرارة الغرفة بسرعة …

      يصير تسوينها بأي شكل أكيد ….

  5. 16/10/2012 8:04 م

    بااارك الله فيك
    ك

  6. طارق permalink
    08/10/2012 2:12 م

    أول مرة أجرب سينامون واللذة لا توصف : ) رغم أني جربت بنصف المقادير وأستبدلت البيكان باللوز مسكر المرة المقبلة سيكون إن شاء الله تجريب الوصفة كما هي بدون تبديلات …غلطت لما وضعت التغطية فوق القطع ثم وضعتها في الفرن …لما رجعت للموضوع وجدت انك ذوبت التغطية في ميكرووند قبل وضعها على قطع السنامون …..جزيل الشكر لك خالد على الشرح..
    التطبيق http://www.mediafire.com/view/?5b31674pb2ax6tn

    • 08/10/2012 7:41 م

      بالصحة …..

      اللوز لذيذ معهم وأي نوع مكسرات ممكن يستخدم …

      التغطيه ما يحتاج لا تنحط في الفرن ولا المايكروييف هي بس تندهن عالخبز وهو حار وهو راح يذوب لحاله. أنا قصدت بالمايكروييف التغطية الزايدة اللي أقدمها عالجنب …

      • طارق permalink
        08/10/2012 7:51 م

        هي بالفعل اللي قصدت التغطية الزايدة اللي تقدمها على جنب … في الصورة اللي وضعت تظهر جامدة ..رغم أني وضعتها بمجرد ان خرجت القطع …

  7. 05/10/2012 7:06 م

    طيب شيف فيه حركة شفتها بمسلسل عن الخبز ,, واتوقع تعرفها
    انك تحط في الفرن كاست موية ع شان ترطب جو الفرن ويطلع الخبز رطب
    ,, ينفع اسويها مع السينبون ؟؟ لأني ماثق بفرننا صراحة ,, -_-

    • 05/10/2012 7:19 م

      لا لا ما فهمتي الحركة …. هذي الحركة موب عشان تخلي الخبز رطب أصلا الخبز يستوي إذا وصل الحراره اللي تكون المويه اللي داخله “تقريبا” تبخرت يعني مهما حطيتي بخار داخل الفرن ماراح يطلع الخبز رطب.

      فكرة الحركة اللي تقصدين هي إنها تدخل بخار في الفرن. الأفران التجارية فيها زر يدخل بخار مويه داخل الفرن بس أفران البيوت مافيها فنضطر ندور حل ثاني زي إننا نحط ثلجه أو صينية فيها مويه حاره أو حتى إننا نرش الخبز نفسه بمويه.

      طيب وش فايدة المويه في عمل الخبز ؟ الفايدة الأولى هي إن الخميرة تحب الرطوبة وهذا يعني إنها راح تشتغل زي المجنونه في أول دقايق تدخلين الخبز الفرن ، خميرة تشتغل أقوى يعني خبز منفوش أكثر.

      الفايدة الثانية هي إنها تخلي وجه الخبز رطب فترة أطول وهذا يعني إنه ماراح يتصلب بسرعة في الفرن. إذا كان وجه الخبز لين في الفرن هذا يعني إنه بيستمر ينفش فترة أطول وهذا يعني خبز منفوش أكثر.

      طيب هل تنفع هذي الحركة في أي وقت وأي مكان ؟ لأ طبعا !!! بعض أنواع الخبز هيكلها جدا هش وبتطيح مع هذي الحركة وبعض الأنواع بتستفيد. الموضوع شوي معقد بس خلاصة الكلام هي !! أمشي عاللي مكتوب في الوصفة !!!! اللي كاتبين الوصفات يعرفون شغلهم ما فاتت عليهم !!

  8. غير معروف permalink
    05/10/2012 10:57 ص

    هل يوجد مسميات اخر للبيكان ؟؟

    • 05/10/2012 2:39 م

      حسب ما أعرف مافيه بس منيب متأكد من كلامي. أسمعهم يسمونه أحيانا لوز أمريكي إذا جيت أفهمهم ويعرفونه بس ما أعتقد إنه إسم رسمي ؟

  9. غير معروف permalink
    04/10/2012 2:01 ص

    السلام عليكم
    اشكرك ع الوصفه
    جربتها اليوم حطيت ٣ كاسات وربع دقيق
    واستعملت صينيه عاديه موب زجاج وقبل الوقت اتحمرت من تحت سودت شوي

    الحين باقي عندي سينابونات ما اكلناهم بعضها عليها صوص وبعضها لا هل اقدر احطها في الفرن وحط تحتها في صينيه شوي مويه ساخنه عشان ترجع رطبه لاني احس انها ناشفه شوي رغم اني مشيت ع الوصفه بس مشكلة التحمير الزايد قهرني
    الله يكتب لك الخير في كل حرف تكتبه ويسخر لك عباده ويحفظك لوالديك

    • 04/10/2012 3:14 ص

      وعليكم السلام و الرحمة ….

      اذا كنتي حطيتيها على صينية معدن أكيد راح يصير كذا لأن المعدن ينقل الحرارة أسرع من الجزاز وراح تستوي غالبا أسرع من الجزاز بعد.

      حطها في حمام بخار ماراح يعالج شي. تقدرين تسخنينها وهذا بيلينها شوي بس ماراح يخليها لينه مره لأن هذا طبيعي في أي خبز يقدم يصير فيه كذا.

  10. غير معروف permalink
    02/10/2012 1:33 ص

    This is unbelievable! Can I marry you already please?? Gosh! Everything you do looks AMAZING!

    • 02/10/2012 2:18 ص

      lol thanks a lot I appreciate it but are you willing to clean lots and lots of dishes 😉

      • غير معروف permalink
        02/10/2012 9:35 م

        with the utmost pleasure! I would even enjoy doing the dishes after someone’s served me this paradise of food for free 😉

        • 02/10/2012 10:46 م

          Lol then it is dcided

  11. 01/10/2012 5:07 م

    ما هذه الاكلة

  12. غير معروف permalink
    01/10/2012 2:44 م

    أرجوك شيف تجاوبني وما تحذفه لأنه حاولت أضعه في الأسئلة العامة وما زبط بقول فيه مشكلة… فيه ناس سألوك عن الكبسة دورت في الوصفات ما لقيتها… كمان انا عندي مشكلة بالفرن بما انه عندك خبرة يمكن تساعدني… فرني غاز واذا جيت اولعه من تحت يولع عادي بس بتلاقيه بعد فترة بلشت تضعف النار وبضطر أقويها من مفتاح الفرن… وبطلت اقدر أعمل كيك لأنه هيك ما بعرف درجة الحرارة أولا… وثانيا النار بتكون جدا عالية وغير ثابتة… اذا مر عليك هيك مشكلة يا ريت تفيدني بالحل… وما تنسى رابط الكبسة… مشكووووووووووور مع الاعتذار

    • 01/10/2012 3:15 م

      نزل السؤال هناك وجاوبت عليه هناك عشان كذا احطف المكرر

      • غير معروف permalink
        01/10/2012 3:53 م

        معلش شيف سامحني بس رجعت دورت ومالقيته هناك ممكن تجاوبني لأني بستنى الجواب من خبرتك شيف… مشكووووور مرة ثانية وبتأسف عالازعاج

        • 01/10/2012 4:03 م

          منيب في البيت الحين ارجعي بتلاقين سؤالك والجواب

      • غير معروف permalink
        01/10/2012 7:04 م

        والله ياشيف دورت منيح واكثر من مرة وما لقيته انا بغلبك بس هاد من زود طيبك وعشمنا فيك معلش ترد هنا

        • 01/10/2012 7:12 م

          تفضلي هذا رابط الجواب أحس مالك عذر الحين هههههه

          http://topchefcooks.com/ask-me/comment-page-93/#comment-14961

  13. غير معروف permalink
    01/10/2012 2:06 م

    شيف ميزان الحرارة من هنا ولا من كندا؟ وكم سعره تقريبا ؟

    • 01/10/2012 6:10 م

      من كندا. لو بتدلعين نفسك وتشترين أحسن أحسن أحسن ميزان حراره مستحيل يتعدى ١٠٠ دولار !! هذا مثلا كان ب ٧ دولار على ما أعتقد.

  14. غير معروف permalink
    01/10/2012 10:03 ص

    وكمان اذا ما فيها غلبة هل يوجد تكملة أو جزء ثاني للآيس كريم والمثلجات

    • 01/10/2012 11:56 ص

      إن شاء الله بس ماراح يكون قريب

  15. غير معروف permalink
    01/10/2012 5:58 ص

    اخوي سألتك عن التغطيه قلت لي راجعي صفحة السينمون هذا انا فيها وقريت الموضوع ماحصلت طريقة التغطيه السايله!\مدري انا مااشوف ولا شالسالفه!

    • 01/10/2012 11:55 ص

      هلا والله …..

      “الحين و السينامون روول حار ندهن الحبات بالتغطية عشان تذوب وتسيح عالأطراف. ”

      سويها مره وحده وبتفهمين العملية كلها أوضح صدقيني….

  16. Mohammed permalink
    30/09/2012 6:36 م

    هلا شيف ، الكمية شوي كبيرة هل اقدر بعد مرحلة التخمير الثانية (التخمير داخل الثلاجة) افرزنها ؟

    • 30/09/2012 6:51 م

      لا أفضل قبل يعني بعد التشكيل مباشره بعدين طلعها إذا بغيتها من اليوم اللي قبل وخلها في الثلاجه طول الليل بعدين كمل عادي. مدري عن الطعم ماراح يكون نفس الشي بالضبط ترى هنا.

  17. هدى permalink
    30/09/2012 6:24 ص

    سبحان الله كنك عارف اني بطلبها منك

    كنت امس اقول بكرا بسال شيف خالد عن السينبون

    الله يعطيك الف عااافيه وبحول الله وقوته بجربها قريب

    جعل يدينك ماتمسها النار يارب

    • 30/09/2012 5:48 م

      آمين يارب …

      بالعافية على قلبك…

  18. 29/09/2012 9:49 م

    تسلم يدينك ..

  19. nahed permalink
    29/09/2012 9:10 م

    شيف خالد ….
    بدي منك الكبسه السعوديه
    وشكرا على تعبك معنا
    اسلوبك رائع بالشرح والتوضيح والتدقيق عالمكونات وكل شي
    هدا الصح

    • 29/09/2012 9:20 م

      موجوده في صفحة الوصفات ….
      .

  20. nahed permalink
    29/09/2012 8:43 م

    لك الله يعطيك العافيه ويسلمو هل ايدين .

    • 29/09/2012 8:45 م

      الله يسلمك

  21. Najah permalink
    29/09/2012 12:48 م

    السلام عليكم
    مع إني ما أحب السينامون كثير بس حمستني أجرب،،
    سؤالين؛
    الأول: هل صحيح إنه الخميرة الأفضل تنحفظ في الثلاجة أو الفريزر ولا عادي ما تفرق لو كانت برا؟!
    الثاني: عندي مشكلة مع السكر البني،، بعد أول استخدام ألاقيه نشف وصار تقريباً متكتل كأنه حصى مع إني مقفلة عليه وما خليته مكشوف،، ايش المشكلة وكيف المفروض أحفظه؟!

    • 29/09/2012 6:09 م

      وعليكم السلام و الرحمة ….

      الخميره اللي نستخدم مجففه. إذا الرطوبة اللي في الهواء وصلتها ممكن ترجع تعيش وتموت ومع الوقت يموت عدد كبير منهم ويخليها تصير أضعف و أضعف إلين تصير جدا ضعيفة. موب شرط تحفظينها في الفريزر بس هذا بيطول عمرها.

      السكر البني فيه رطوبة. إذا تبخرت هذي الرطوبة يبدأ يتلصق في بعض ويطلع زي ما تشوفين. غطي العلبة زيييين ولو تبين حطي معها من الحافظات حقت السكر البني اللي تنباع اللي تكون زي الفخار تنقعينه في مويه وتحطينه في العلبة حقت السكر. عن نفسي أشوف أسهل حل إنك تحطينه في المايكروييف إلين يرجع يلين من جديد هذا أسرع حل لقيته.

  22. الاوتار permalink
    29/09/2012 6:01 ص

    الف شكر على لوصفة الرهيبة

  23. اروى من مكة permalink
    29/09/2012 1:40 ص

    السلام عليكم ورحمة الله ..
    يسعدني ان اكون من اللي جربوا عمل السينامونرولز على طريقتك ..
    لقيتها بمنتدى شامواه و سويتها مرتين .. واخرتها امس .. لكن واجهتني مشكلة ان العجينة تطلع ناشفة ويابسه .. صدق انها لذيذة وتذوب بالفم بس ناشفة ..
    انا الصراحة اخطأت بالمقادير ومااكتشفت الا يوم قريتها بالمدونة .. المكون اللي اخطأت فيه هو الخميرة .. بالمنتدى ماخصصت حجم الملعقة واكتفيت بذكر انها ملعقتين ونص خميرة .. طبعا بما انك ماخصصت قلت انا اكيد انها كبيرة .. الصدق ريحة الخميرة صرعت قلبي .. بس بما اني واثقة بطريقتك تحملت ..
    عاد ما ادري اذا كثر الخميرة له دور بجعل العجينة ناشفة .. ؟
    وجزاك الله خير .. ووفقك ..

    • 29/09/2012 3:44 ص

      وعليكم السلام و الرحمة ….

      معاك حق في الخطأ وحقك علي هو فعلا خطأ كبير بس للأسف مقدر أعدل شي بعد الكتابة في المنتديات. عموما في الخميرة نادرا ما تستخدم الملاعق الكبيره وخصوصا على كمية طحين بسيطة زي كذا !!

      زيادة الخميرة ممكن تسبب إن العجينة تنفش أسرع من اللازم وبكذا تطيح في الفرن وتبان ناشفة بس أكبر سبب ممكن يسبب هذي المشكلة هو الطبخ أكثر من اللازم وإستخدام طحين أكثر من اللازم. في الطحين حطي طحين يكفي إنه يوصل العجينة للمرحلة اللي ذكرت بس ما يحتاج تستخدمين كل الطحين أبدا !

  24. غير معروف permalink
    29/09/2012 1:37 ص

    ياإللهي سينمون😋
    يعني معقوله بتصير اللذ من محلات السينمون المنتشره عندنا؟؟؟؟؟انا بصراحه ماقد ذقت اللذ ولا اطرى منها …ان شاًء الله نجرب ونشوف

    بالنسبه للطحين ايه افضل الكويتي الابيض والا الابيض العادي حق جميع الأستعمالات؟؟؟
    والخميره تقصد فوريه وإلا عاديه؟؟

    وكل الشكر لك والله يجزيك خير

    • 29/09/2012 3:41 ص

      ليش مستغربة كأنه مستحيل أحد يسوي شي أطعم من محل أو مطعم ؟

      الكويتي حق جميع إستخدامات و الثاني حق جميع إستخدامات. شخصيا ما شفت فرق …

      عندك خميرة طازجة هههههه ؟ الخميرة أكيد فوريه …

  25. dalal mys permalink
    29/09/2012 1:36 ص

    سبق و طرحت المقادير في أحد المواقع و جربتها النتبجة أكثر من رائعة و الطعم مثل ما قلت يفوق شغل محلات السينابون

    دمت متألق دوما أخوي خالد

    • 29/09/2012 3:39 ص

      بالعافية ومشكوره على كلامك

  26. شروق permalink
    29/09/2012 1:21 ص

    خطير جدا….. يعطيك العافية.

    • 29/09/2012 3:39 ص

      مشكورة من ذوقك

التعليقات مغلقة.

%d مدونون معجبون بهذه: