تخطى إلى المحتوى

السعودية : مطبق الفول ..

30/05/2011

هلا والله …

 

هذا الموضوع تابع لفعالية حول العالم في ٣٠ يوم.

 

ماكنت ناوي الصراحة أسوي موضوع عن الأكل السعودي لأن مافيه شي جديد ينقال بالعكس هو السبب اللي خلاني أبدأ الفعالية أصلا ، تكرار نفس الأكل كل مره بنفس الطرق. عموما الأكله اليوم جدا سهلة ووحده من ألذ الأكلات عندي ، لو آكلها كل يوم ما قلت لأ. المطبق أكله شعبيه سعوديه ومن أصل هندي أو يمني على ما أعتقد وموجود شي قريب لها حتى في الأكل الأندونيسي. المطبق عبارة عن عجينة نحيفة محشيه حشوة لحم مليانه بيض وكراث في الغالب أو تكون حلوه ومحشيه موز وقشطة. المطبق أكله تتقبل حشوات كثير برأيي وما أشوف ليش ما نحشيها بأشياء غير الحشوتين هذي بس ؟

 

المطبق اللي بسويه اليوم محشي بحشوة فول. الفول اللي مستخدم بيكون كامل يعني ماراح يكون فول مطحون وبيكون مطعم بكراث كثير و بيض بالضبط نفس حشوة اللحم. الحشوة هذي جدا لذيذه وتنفع مع كذا شي غير المطبق.  العجينة هنا مسويها بنفسي تلاقون الطريقة في موضوع عجينة المطبق بس تقدرون تستخدمون عجينة سمبوسة جاهزة أو حتى عجينة سبرينج رول وكلها بتعطي نتيجة رهيبة.أنا هنا بستخدم فول ناشف و أطبخه من الصفر إذا تبون تقدرون تستخدمون فول معلب مطبوخ وجاهز الخيار راجعلكم.

 

 

المقادير :

 

عجينة مطبق

كوب فول ناشف أو ٣ أكواب فول معلب

حبة بصل مقطعه صغار

٣ حبات بصل أخضر

٤ فصوص ثوم مقطعه صغار

عود فلفل أخضر حار ( إختياري )

ملعقة كبيره معجون طماط

ملعقة ونص كبيرة كمون

ملعقة صغيرة كزبرة

نص ملعقة صغيرة بابريكا ( يفضل مدخنه لو عندكم )

ربع كوب كزبرة مفرومه

٣ حبات طماط مقطعه صغار

بيضتين

كراث حسب الرغبة مقطع صغار

صوص دقوس وصوص طحينه للزينه

 

 

الطريقة :

 

نغسل الفول الجاف بعدين نفرده على صحن ونتأكد إن مافيه أي بقايا حصى أو أغصان. بعد كذا ننقع الفول في مويه باردة كثيره طول الليل.

 

ثاني يوم نصفي الفول من مويه النقع بعدين نحطه في قدر ونغطيه ب 3 أكواب مويه مع شوي زيت زيتون . نغلي المويه على غليه جدا خفيفه ونخلي الفول يطبخ إلين يصير شبه لين بس شوي قاسي من داخل تقريبا ساعة ، بعدين نحط الملح ( تقريبا نص ملعقة صغيرة ) ونخليه يكمل طبخ إلين يصير لين. هذا الفول الحين مطبوخ جاهز تقدرون تستخدمونه علطول بالضبط زي ما تستخدمون فول العلب أو تقدرون تصفونه بعدين تفرزونه أو تحفظونه في الثلاجه أسبوع تقريبا.

 

الحين نسخن مقله على حراره هاديه ونطبخ البصل و البصل الأخضر و الثوم و الفلفل الحار مع رشة ملح إلين يذبل تماما ويبدأ ياخذ لون ذهبي خفيف ، تقريبا ربع ساعة. لا ترفعون الحرارة ولا تطبخونه أقل من كذا ، طبخ البصل لهذي الدرجة يعطيه عمق نكهة رهيب مع الفول.

 

CARAMALIZED ONION

FOUL FILLING

 

الحين نحط معجون الطماط ونطبخه شوي تقريبا دقيقه بعدين نحط الفول المطبوخ بعد ما نصفيه مع الكمون و الكزبره و البابريكا و الكزبرة المفرومه ونخليهم يطبخون شوي . الحين نطفي النار ونكسر البيضتين عالخليط ونضيف الكراث و الطماط ونذوق الخليط ونعدل البهارات و الملوحة و الحموضه حسب الرغبة.

 

الحين عشان نحشي الخليط. ناخذ عجينة المطبق اللي سوينا وفردنا ونقص كل شريحة سوينا بالنص بالعرض يعني بيصير عندنا شريحتين أقصر من الأصليه. نحط الشريحتين فوق بعض بحيث يتقاطعون على شكل + ونحط شوي من الحشوة في النص بعدين نقفل عليها من ال ٤ جهات. نقص الزوائد لو كانت موجوده ونحطها عالجنب إلين نطبخ المطبق.

 

الحين عشان نطبخ المطبق نسخن مقله أو صاج على حرارة وسط مع شوي زيت وبعد ما تحتر نحط المطبق ونطبخه إلين يتحمر الوجه الأول بعدين نقلبه ونطبخ الوجه الثاني إلين يتحمر.

 

fool m6abaq

 

مطبق فول

 

 

 

Follow TopChefCooks on Twitter

Advertisements
32 تعليق
  1. Najah permalink
    17/09/2012 4:32 م

    السلام عليكم
    طيب إذا أبغى الحشوة المعتادة اللي هي خضار وبيض زي المطاعم،، هل أمشي على نفس المقادير والخطوات لاستثناء الفول؟

    • 17/09/2012 5:14 م

      وعليكم السلام …

      الحشوة هذي حشوة فول غير شوي عن الحشوات الثانية

  2. الاوتار permalink
    16/07/2012 3:20 ص

    الف شكر لك اخوي على الوصفة وش رايك طيب لو دخلتها بالفرن

    • 16/07/2012 4:07 ص

      ينفع ليش لأ ، حطها في فرن حار مره يعني ٤٥٠-٥٠٠ كذا ، يمكن تحتاج تقلبها بعد نص الوقت. بس أحس الموضوع ما يحتاج خصوصا إنها تاخذ دقايق عالنار مجرد تحمير الوجه.

  3. 09/06/2012 3:11 م

    تسسسسلم ايدك ياشيف

  4. 17/12/2011 8:51 م

    ما شاء الله ابداع بس بالنسبه للزينه الا على المطبق اي نوع من الخضار هل هي حبة بركه منبته زي ما اظن ام ماذا ولك جزيل الشكر

    • 18/12/2011 2:41 ص

      الزينه هذي براعم بصل أخضر يعني بذور بصل منبته.

  5. ام وسام permalink
    21/10/2011 7:57 م

    وصفة حلوة راح اجربها باقرب فرصة بس حبيت اسالك هل انت توب شيف اللي بمنتدى المساطيل
    اند كمان انا مدمنة عصير اعشق شي اسمه جوس وحابة اطلب منك تنزل لنا وصفات كوكتيلات اذا تكرمت

    • 21/10/2011 11:00 م

      أنا اللي في المساطيل عليك نور ..

      الكوكتيلات والله بكون صريح معك بس موب شي يمكن يوم أنزل عنه موضوع. مدري أحس الموضوع سهل وواضح تعصرين العصير وتخلطين لو تبين كم نوع ما يحتاجلها شرح زايد ؟

  6. الأمـل permalink
    18/10/2011 9:47 م

    الله يسلم ايدينك , فكره جديده وحلوه فعلا ماقصرت وأكيد راح اجربها .

  7. أمل permalink
    02/09/2011 2:44 ص

    السموحه ما انتبهت انك ذاكر بالموضوع عن عجينه المطبق
    سؤالي لو سويتها بعجينه السمبوسه لوزان مثلا ولما اجي اقليها هل اترس الطابي بالزيت مثل ما اقلي السمبوسه بحيث اغرقها ولا مثل ماذكرت مجرد اشوي من الزيت؟
    وهل تنضج كامله العجينه بالقليل من الزيت ؟؟

    وشكرا

    • 02/09/2011 5:01 ص

      زي ماشرحت بالضبط لاتغيرين شي ، لو كان فيه فرق كنت بقولك لا تخافين .

      نعم العجينة تستوي بدون ما تتغرق بالزيت. المهم هو إن الحرارة تدخل العجينة بس ، وجود الزيت أو عدمه هذا موب مهم ، الزيت يخلي الحراره تدخل من جميع الجهات بنفس الدرجة وفي نفس الوقت يعطي طعم ، هو بس بيخلي العجينة تتلون بشكل منتظم أحسن بدال ما تكون محروقة من مناطق ونيه من مناطق.

      المهم هو إنك أنتي تتحكمين بحرارة الطبخ بحيث إنها تستوي وفي نفس الوقت ما تنحرق.

  8. 02/09/2011 2:37 ص

    ايش تقصد بعجينة المطبق هل تعجن بالبيت ام هي عجينه جاهزة ؟؟ ووين ممكن احصلها وايش البديل لها ؟؟
    ويعطيك الف عافيه
    امل من قطر

  9. ام يوسف ( القلوب اطفال ) permalink
    04/06/2011 8:15 ص

    ما شاء الله تبارك الرحمن

    الله يحفظك

    بس بغيت حشوات ثانيه اذا ممكن

    الله يعطيك الصحه والعافيه

    • 04/06/2011 8:45 ص

      أي حشوه سمبوسة أو حتى باستا تعجبك ينفع تنحط هنا

  10. غير معروف permalink
    03/06/2011 5:41 م

    وصفة الدقوس اذا تكرمت

    • 03/06/2011 8:56 م

      ٣ طماطات مقسومه في النص + فصين ثوم + ٣ قرون فلفل أخضر أو حسب الرغبة . حطيها في صينية فرن بعدين إشغلي الشوايه حقت الفرن ( يعني من فوق على أحر شي ) وحطي الصينية قريبه منها إلين ينشوي كل شي . طلعيها من الصينية وقشري الطماط بعدين حطي كل المقادير في خلاط مع شوي عصير ليمون ورشة ملح وفلفل أسود وشوي كزبره و أخلطي إلين يعطيك دقوس. عدلي الطعم و الملوحة على ذوقك .

  11. غير معروف permalink
    03/06/2011 4:51 م

    تنفع بدون بيض لمن لدية حساسية من البيض

    • 03/06/2011 8:53 م

      طبعا تقدرين

  12. غير معروف permalink
    01/06/2011 9:52 ص

    شيف اذا ابحط فول معلب احط الحبوب لحالها
    والا مع المويه حقتها

    • 01/06/2011 11:58 ص

      لا لا ! دايما شيلي المويه وأغسلي الفول قبل تستخدمينه.

      • غير معروف permalink
        02/06/2011 6:06 ص

        دايما قصدك حتى لو بسوي فول عادي!

        • 02/06/2011 6:23 ص

          إيه حتى للفول العادي ، زيدي مويه بعدين لو تبين . طبعا هو موب خطأ تستخدمين المويه بس البقوليات المعلبه أصلا طعمها متغير فلو غسلتيها وشلتي المويه يعني تتحسن شوي.

  13. NAS permalink
    01/06/2011 7:37 ص

    النتيجة ولا بالاحلام ..

    وصفة شهية .. ابدعت .. والشكل النهائي خير دليل ^ـ^

    زوجي تابعها معايا برضو عجبته

    شي ابداعي بصراحة
    شكرا وان شاء الله تتطبق

  14. روح permalink
    30/05/2011 11:36 ص

    الله الله عليك ي شيفنا , ربي يحرسك ..
    للفنون جنون وانت أثبت ان للطبخ فن جنوني ..
    من متابعينك من أول خطواتك ونشرها في المنتديات
    الى المدونه
    ماشاء الله تبارك الرحمن ..
    وصفتك جدا لذيذه مزج خبز المطبق المقرمش مع حشوة الفول مع طحينيه وش أكثر من كذا
    رااائعه جدا
    ان شاء الله بجربها
    لاهنت ي اخوي ..

  15. 30/05/2011 10:39 ص

    حلوه الوصفه..جديده وغريبه

  16. نور permalink
    30/05/2011 7:58 ص

    اول مره اسمع بالاكله هذي
    الصراحه شكلها يهبل
    حتى حمسه الفول قبل لا تحط البيض عجيبه تصلح حق العشا مع خبز
    مشكور

  17. غير معروف permalink
    30/05/2011 7:28 ص

    يالبى السعودية واهلها
    انا دايما انوع بحشوات المطبق بس ماجا ع بالي الفول ابدا
    تسلم ع الفكرة
    ويعطيك العافية

  18. زائره permalink
    30/05/2011 6:35 ص

    الله يرضى عليك كيف طريقه لفها بالسبرنق رول او السويتيز

    • 30/05/2011 9:09 ص

      السويتيز أعتقد تقصدين عجينة السمبوسة ؟ عادي زي ماقلت في الموضوع تستخدمين حبتين وتحطينهم علامة + وتحطين الحشوة في النص وتقفلين عليها مره سهلة.

      السبرنج رول ما تقدرين تسوينها مربعه شوي صعب . أفضل حل تحطين الحشوة في جهة وتقفلين عليها بالجهة الثانيه بحيث تعطيك شكل نص دائرة ..

  19. Emi permalink
    30/05/2011 6:09 ص

    مرحبـــا Top Chef
    أنا عشقي الطبخ .. و معجبة بمواضيعك كثيـــــــر .. جربت أكثر من طبق وكانت النتيجة حلوة
    بصراحة لو أنا منك أفتح مطعم ولو اني عارفة انك رافض الفكرة.
    ياريت لو تنزل وصفات روبيان أكثر و حلويات كمان ..
    يعطيك العافية

Trackbacks

  1. ختام فعالية حول العالم في ٣٠ يوم …. « مدونة توب شيف … Top Chef

التعليقات مغلقة.

%d مدونون معجبون بهذه: