Skip to content

… Ask me


السلام عليكم

هنا تنحط كل الأسئلة الخاصة بالطبخ وراح أجاوب عليها إن شاء الله في أسرع وقت.

* ياليت ياليت لو تسون بحث عن الوصفة في المدونة أو في صفحة الوصفات قبل السؤال ،هذي الصفحة للإجابة عن الأسئلة موب دليل هاتف للمدونة.

* أي سؤال عن مكان توفر مكون أو جهاز سواء في جده أو غيرها هو شي موب من إختصاصي وسيتم حذف السؤال.

* في حالة السؤال بدون تعبئة كل المعلومات المطلوبه مثل الإيميل و الإسم وغيرها يمكن يتأخر ظهور السؤال فيرجى عدم تكرار الأسئلة في حالة عدم ظهورها في نفس الوقت.

ملاحظة : ما يحتاج إنكم تكتبون الإسم و الإيميل و الموقع بس أكتبوا الرساله وخلوا الباقي فاضي

11,279 تعليقات
  1. غير معروف permalink
    29/11/2011 9:36 م

    عندي بقايا دجاج بالكاري الاخضر التايلندي وحابة اسوي فيهم ساندوتشات

    ايش الصوص والمكونات اللي تمشي معاه

    • 30/11/2011 2:02 ص

      الكاري مكون فيه مليون مكون ما يحتاج شي ثاني معه عشان كذا ياكلون الكاري مع رز ساده موب العكس.

  2. غير معروف permalink
    29/11/2011 6:58 م

    السلام عليكم
    احيانا لما اسوي معجنات يكون فيها طعم الخميره واضح ومزعج فما ادري وش السبب هل اكون مكثره الكميه او حاجه ثانيه

    وكمان ابسال لو حبيت اسوي كمية رو كبيره واحطها في الفريزر واخذ منها اذا احتجت يصلح او لا ؟

    • 29/11/2011 7:30 م

      وعليكم السلام …

      كمية الخميره ومكان التخمير بتأثر في النكهة حقت الخميرة. صح لو كانت الكمية كبيرة و تخمرت في مكان دافي يمكن تعطي طعم ما يكون مستحب أحيانا ويكون شوي مزعج بس لو الكمية مضبوطه وتخمرت على حراره معتدلة بتعطي طعم خميرة بس طعم حلو. أستغرب الصراحة من ناس كثير يعتبرون طعم الخميره شي سلبي مع إنها واحد من الأشياء اللي تعطي الخبز طعمه المميز ؟ طعم الخميره حلو وموب شي مقرف أو يخوف أو عيب في الخبز في أغلب الأحيان.

      الرو تقدرين تفرزينه بس وش الهدف ؟ أصعب في القياس و يحتاج تذويب هذا غير إن الرو ما ياخذ ٥ دقايق عشان يتسوى ؟

  3. غير معروف permalink
    29/11/2011 3:54 م

    السلام عليكم و رحمة الله و بركاته

    عندي سؤال بخصوص تارت الفواكه..
    لما نسوي الفواكه بماذا ندهنها عشان
    ما تتأكسد؟؟
    و سؤال ثاني: هل في حشوات ثانية حلوة للإكلير
    غير الكريم باستري؟؟

    • 29/11/2011 5:12 م

      وعليكم السلام و الرحمة …

      تارت الفواكه شوفي موضوع البافلوفا في المدونة وأدهنيها بنفس التغطية.

      تقدرين تحشين الإكلير أي شي حلو أو مالح مين قال إن مافيه إلا الكريم باتسييه ؟ تقدرين تحشينها إسكريم (بأي نكهة) ، كريم باتسييه ( أنسي فكرة إن الكريم باتسييه بس فانيلا تقدرين تسوينها بأي أي أي نكهة على بالك ) ، كريمة مخفوقه ( بعد بأي نكهة ) ، كريمة بافاريه Bavarian cream ، جبن أو حشوه جبن وغيرهم بعد كثيييييييير .

  4. zaINAB permalink
    29/11/2011 1:24 م

    مرحببا
    نتعبك ويانا الله يعينك علينا هههه
    ابي اسالك الطحين البر هل يحتاج طريقة معينه لما ابي اصلح به فطاير
    دايم لما استبدله مكان الطحين العادي تطلع معي الفطاير قاسيه و العجينه ابد ماهي مرنه
    مع اني اسوي له نفس خطوات الطحين العادي وتطلع العجينه حلوة حيل


    صراااحه ودي اكتب لك رسالة شكر كبيرة عريضة
    من مدونتك تولد عندي شعورييين شعور حلو وشعور سيئ
    الشعور السيئ : ان احنا كنا ما نعرف ناكل او بمعنى اصح اكلنا استغفر الله ناكل وسخ المطاعم وتكرم النعمه
    الشعور الحلو: ان مفروض ما نسكت عن مستوى الخدمة السيئة الي تتقدم لنا في هالمطاعم صرت اروح المطعم وانشب لهم اشوي ويقولو لي بندفع عنك الفاتورة بس خلصينا حسيت اني مثقفه في الطبخ اعرف وش اكل وش الاخطاء الي في الطبخه وش ناقص وش زايد وش سيئ وش زييين
    اهني نفسي على معرفتي لمدوونتك يا بطل والله يوووفقك 3>

    • 29/11/2011 3:23 م

      هلا والله …

      عجين البر مهما سويتي ماراح يكون زي قوام العجين الأبيض العادي فدايما حطي هذا في بالك. في العجين البر نبدل نص الطحين بالكثير بر و الباقي لازم يكون أبيض. نبدل بدال كل كوب أبيض ٣/٤ كوب طحين بر تقريبا.

      العيب موب فينا ، موب إحنا اللي ما نعرف ناكل ، بس إحنا نقيس على اللي موجود و اللي موجود للأسف ما يستاهل فغالبا ما نعرف وش فيه زياده وكيف مفروض الأكل يكون. بالعربي ما عندنا نقطه مرجعيه نحكم فيها على جودة الأكل. لوقت قريب كان فكرة الناس عن البرجر الجيد هو حق ماك !!! ومازال فيه ناس يعتبرون البيتزا الجيده هي بيتزا هت و القهوة الجيده ستاربكس وكذا … هذي موب بس مشكلة عندنا ترى الشعوب اللي يهتمون بالمطاعم تلاقين أكلهم ذائقتهم عالية وهذا موب عندنا.

  5. غير معروف permalink
    29/11/2011 1:16 م

    عندي سؤال كيف اقدر احكم هذه الاكلة مع رز بسمتي ابيض والا مع مصري بالشعيرية

    والا مع مكرونة

    والا هذا راجع للذوق الشخصي؟

    • 29/11/2011 2:28 م

      كيف يعني ؟ عطيني مثال أحسن .

      • غير معروف permalink
        29/11/2011 3:14 م

        يعني لم اسوي ايدام او صينية خصوصا لو جديدة علي مدري ايش االافضل معاها

        ماعندي حاليا شي معين يمكن زي الاسترنجروف او ايدام بالخضار جزر وبطاطس والدجاج زي كدا

        • 29/11/2011 5:23 م

          أها قصدك كطبقك جانبي. هي بالضبط زي ماقلتي شي راجعلك أولا و أخيرا مافيه قواعد ثابتة هنا .حاولي تفكرين في الطعم و القوام و النكهة وكيف تمشي مع بعض ولو حسيتي إنك ضايعة أمشي على المناطق الجغرافيه وكيف ياكلون كل طبق وبتلاقين معه دايما نشا. مثلا الطواجن غالبا تتقدم مع كسكسي ، اليخنات العادية الإنجليزيه و الفرنسيه تتقدم مع بطاطس أو خبز في الغالب ، الستراجنوف يقدمونه مع باستا شبتزل أو نودلز بيض عاديه أو حتى بطاطس وكذا ….

          شوفي فعالية حول العالم في ٣٠ يوم وحاولي تشوفين كيف البلدان تستخدم النشويات في أكلها من مكان لمكان هي فكرة بتوصلك مع الوقت.

  6. غير معروف permalink
    29/11/2011 10:04 ص

    السلام عليكم و صباح الخير .،
    شسمه اول كنت اسوي الكيكه و تنتفش واذا طلعته من الفرن ما تنخفس لا تحافظ ع شكله
    بس الحين نفس الكيكه مسويتها مليون مره وضابطه و نفس الطريقه و نفس الفرن نفس كل شي
    بس تنتفش بالفرن واذا طلعته انخفست :( ليييش ؟!

    • 29/11/2011 2:27 م

      وعليكم السلام و الرحمة …

      طبيعي الكيك ينخفس برا الفرن شوي.

  7. غير معروف permalink
    29/11/2011 6:26 ص

    صباح الخير
    شيف لوسمحت عندي سؤال لما اعجن عجين خبز عربي وابغاه لثاني يوم انقص من مقدارالخميرة ولا اخليها زي ماهي
    ولو خليتها زي ماهي بتكثر اخاف انها تغير في طعم وقوام الخبز
    وشكرا

    • 29/11/2011 6:37 ص

      لا تغيرين شي في العجين. حطيها في الثلاجه بس هذا بيبطأ الخمير وقبل الطبخ طلعيها إلين توصل لحراره الغرفه قبل الإستخدام.

  8. sousou permalink
    28/11/2011 11:10 م

    أهلا شيف ..
    أول شي الله يعطيك ألف عآفية على الوصفات و النصائح اللي بتقدمها لنا ..
    شيف عندي كام سؤال محتاجة أعرف إجابتهم بحكم إني لسة ما عندي خبرة كبيرة في مجال الطبخ ..
    هل ينفع أحط سكر عادي بدل السكر البني في الكوكيـــز ؟
    و كمآن كنت بدي أسألك عن القشطة أنا دورت عليها هنا كثيـر و ما لقيتها و للأسف في وصفات كثيرة فيها قشطة و أنا بحب أجربها بس مش عارفة إذا في شي ثاني ممكن أحطه بدل القشطة ؟
    كمان أنا من عشاق الكب كيك و بجرب وصفة الصراحة هي حلوة بس بحسها ثقيلة شوي و بفكر اعمل الكيكة الاسفنجية على شكل كب كيك و مش عارفة إذا ينفع و لا لا ؟
    و بخصوص الكيك حابة أسئلك لما يستوي الكيك في الفرن نطلعه فورا من الفرن و كمان من الصينية و لا نطفي ع الفرن و نترك الكيك بالفرن و لا نطلعه من الفرن و نتركه لحد ما يبرد في الصينية ؟ أنا عارفة انو سؤالي جدااا بسيط و يمكن تافه بس بجد بدي استفيد منك لانو كل واحد و شو بيقول و كمان لاني بعاني من مشكلة هبوط مستوى الكيك اول ما يطلع من الفرن عكس لما بيكون في الفرن بيكون حجمه مرتفع و حلو علما انو ما بفتح عليه الفرن قبل انتهاء المدة المحددة و كمان الكيك بيكون ناضج .. هل هالشي عادي و لا لا ؟
    و أخيـــر شي ( معلش يا شيف سامحني لإني عارفة إني طولت عليك ) عملت حلى عبارة عن بسكويت و حليب مركز محلى و شوكولاتة في الأخير, المشكل اللي واجهته هو في عملية التقطيع , لما جيت أقطع الحلى قطع صغيرة الشوكولاتة كانت بتتكسر معي , جربت اغير السكين بس هالشي ابدا ما حل المشكلة .. و مش عارفة ليه الشوكولاتة كانت بتتكسر ؟ هل من الجودة و لا من السكين ؟ و لا هالشي طبيعي ؟
    و شكراااا شيف الله يعيطــيك ألف عافيـة و يوفقـك يارب ..

    • 29/11/2011 2:35 ص

      هلا والله …

      الإسئلة أحيانا تكتبينها وما تطلع علطول بس هي تكون موجوده فإذا كتبتي سؤال وما طلع أستني إلين أدخل المدونة و أوافق عليه ويطلعلك ما يحتاج تعيدين الأسئلة. عموما فيه وحدة سألتني نفس الأسئلة اللي قلتي بالضبط وجاوبت عليها من كم يوم وشكلها أنتي. سؤال السكر البني و القشطة و الكب كيك جاوبت عليهم أرجعي في الصفحات إلين تلاقينهم.

      بالنسبة لتبريد الكيك هو يعتمد على نوعية الكيك كل كيك له طريقة تبريد مختلفه وعشان كذا الوصفات بتلاقينها غير بعض الأنواع تطلب منك تقلبين الصحن وتعلقينه وهو مقلوب فلا تستغربين و أمشي على الوصفه هذا أفضل شي. اللي غالبا يصير في كيكات الزبت و الزبدة العاديه هي إنهم ينطبخون إلين يستوون في الفرن وبعدين تطلعين الصينية من الفرن وتخلينها تبرد فترة بسيطة وبعدين تطلعينها من القالب وتخلينها تبرد تماما.

      الفكرة من تبريد الكيك هي إن النشا و البروتين يتصلب وما يصير الكيك هش وسهل يتكسر زي إذا كان توه طالع من الفرن وعشان كذا لازم يتبرد. المشكلة هي إنه و إحنا نبرد الكيك فيه شيين ممكن يصيرون : يا إن الكيك ينكمش ويصغر ويكون لاصق في الأطراف وبكذا يتكسر وجه الكيك. أو إن البخار اللي يطلع من الكيك يتكثف عليه ويعطي كيك رطب مره كأنه مغرق في مويه. عشان كذا مهم نطلع الكيك من القالب عشان نمنع عنه التكثف ونمنع عنه إنه يلصق في الأطراف وينشق علينا.

      هبوط الكيك من الفرن طبيعي بس لحد معين. أي كيك بيطلع من الفرن ويهبط شوي المشكلة الكبيره هي لو كان يهبط تماما بعد ما يطلع من الفرن هنا عندك مشكله بس إذا قصدك إنه يهبط شوي فهذا طبيعي. السبب هو إن الهواء في الفرن حار و هذا يخلي فقاعات الهواء داخل الكيك تتمدد و إذا طلعتي الكيك يبرد الهواء داخله وينكمش وهذا اللي يخليه يهبط شوي بس. بس لو كان هيكل الكيك ضعيف مره هنا الهواء اللي داخله بدال ما ينكمش راح يطلع ويهرب وهذا يخلي الكيك يطيح مره.

      الحلى اللي تقصدين ما أعرفه الصراحة شوفي اللي عطاك الحلى هو أفضل شخص يساعدك.

  9. غير معروف permalink
    28/11/2011 5:38 م

    شيف عندي سؤال شخصي شوي . هل أنت تستفيد من الأسئلة اللي تجيك !؟
    يعني قد جتك أسئلة قد ألهمتك بأكلة جديده ! أو فليفور جديدة ؟!

    • 28/11/2011 5:55 م

      أكيد أستفيد ونص بعد بس موب بالضبط بالطريقة اللي في بالك. أنا تجاربي في الطبخ مهما كثرت محدوده يعني مثلا خل نقول إني سويت كوكيز ٥٠ مره في حياتي هذا يعتبر رقم جدا بسيط بعدد الناس اللي سووا الكوكيز حوليني وكل واحد أكيد ظروفه غير ومعداته غير وواجه مشاكل غير وكذا ومن أسئلتهم أستفيد أنا من تجاربهم و أتفاداها و أحطها للناس اللي بشرحلهم بعدها وكيف يتفادونها. هذا مجرد مثال بس نفس المبدأ ينطبق على كل الأسئلة اللي تجي. كثير من مشاكل الطبخ فاهمها نظريا وكيف تصير بس ما واجهتها عمليا في الحقيقة و إذا شفتها عند ناس وعطيتهم الحل وضبط معهم كأني أنا طبقتها عندي. غير هذا كله فيه شي ثاني أستفيد منه من الأسئلة وهو إن كثير من الأسئلة غريبة علي عن مكونات أو طبخات أو طرق طبخ أو حتى مسطلحات طبخ ما قد سمعت عنها و أتعرف من هذي الأسئلة عليها. هذي يمكن أكثر شي أكسبه من الإجابه على الأسئلة.

  10. غير معروف permalink
    28/11/2011 5:36 م

    شيف انا ودي اسوي كوكيز محشي تشوكليت أو براوني
    بطريقة إني أحط شوي من خليط الكوكي بعدين الحشو بعدين أغطيها بالخليط مره ثانيه
    هل تتوقع بتضبط ؟ ولا بتحوس فالفرن وتسيح على بعضهم

    • 28/11/2011 5:44 م

      جربي وشوفي ، أتوقع تعتمد على وصفه الكوكيز و البراوني المستخدمه بس أتذكر قد شفت شي زي كذا بس منيب متأكد. كانت أتذكر في صينية مرصوصه عجينة الكوكيز وبعدين فوقها البراوني.

  11. غير معروف permalink
    28/11/2011 2:18 م

    لو سمحت راح اشوي فيليه هامور
    كيف اخليه مايلصق على شبك الشواء
    مشكور يعطيك العافيه

    • 28/11/2011 3:29 م

      تأكدي إن الشبك نظيف من أي آثار حروق قديمة و أفركيها بليفة خشنه لو ماكانت إلين تروح آثار الحروق. سخني الشوايه و الشبك عليها زيييين قبل تحطين السمك عليها. أدهني السمك و الشبك بطبقة زيت خفيفه و أشويها على نار عاليه. مهم إن النار تكون عاليه بحيث إن السمك أول ما يلمسها يتصلب من برا بدال ما يلصق على الشبك.

  12. zaINAB permalink
    28/11/2011 7:35 ص

    مرحبباا,,

    لما فتحت علبة الانشوجا واستخدمتها الي احتاجه نقلت الباقي الي برطمان قزاز ,
    انت كاتب في حفظ الانشوجا انها تكون في زيت زيتون ؟
    انا بس حطيت معها السايل الي كان في العلبه المعدن
    هل اضيف زيت الزيتون , بالاضافه ان السايل ماهوب معبي كل البرطمان !!

    • 28/11/2011 1:59 م

      إيه غطيها بزيت زيتون زيادة

  13. غير معروف permalink
    28/11/2011 12:56 ص

    مساء الخير شيف
    حبيت اسالك كيف افضل واسلم طريقه لحفظ بواقي الاكل (الارز / الايدام /السادنويش ) بدون ماتتكاثر فيها البكثيريا ؟؟؟
    لان عندي اطفال احيانا كثيره لازم اغرف لهم من الغدا مثلا رز واخليه على سطح الدولاب مغطى طبعا كذا ساعتين واحيانا ثلاث وبعد كذا ياخذوه اطفالي وياكلوه متى ماجاعوا كذا مضر ولا لأ :(…

    • 28/11/2011 2:06 ص

      مساء النور و السرور …

      والله الموضوع هذا جدا جدا جدا طويل صعب أختصره هنا. اللي دايما بسوية هو إني بشرح كيف تحفظين كل شي مكون تستخدمينه في موضوعاتي وبعد فترة بتفهمين الفكرة.بس إذا تبين تفهمين الموضوع أسهل أعرفي قبل كم نقطة.

      أول نقطه هي إن البكتيريا لها بيئة معينه تحبها ، هي تحب المكان يكون دافي ، رطب ، مغذي ، و ما يكون حامض أو قاعدي أو مالح أكثر من اللازم. البرودة تبطأ عمل البكتيريا و الحراره العالية تموتها. الحراره اللي أقل من ٤٠ درجة فهرنهايت ( ٤ مئوية تقريبا ) يبطأ عمل البكتيريا فيها و الحرارة أعلى من ١٤٠ فهرنهايت ( ٦٠ مئوية ) تموت عندها في الغالب. بس الحرارة بين ٤٠ و ١٤٠ هذي منطقة الخطر اللي تتكاثر عندها البكتيريا و تشتغل بأقصى طاقتها فإذا كان الأكل ينطبق عليه الشروط اللي فوق يعني رطب ، مغذي ، متعادل لا هو حامض أو قاعدي أو مالح أكثر من اللازم وكان في مكان حرارته داخل منطقة الخطر (زي حراره الغرفه الطبيعية) فهو معرض للتلوث. المرق و الإدامات و الشوربات مثلا يدخلون تحت هذي القائمة ولازم يايقعدون يطبخون على حرارة أعلى من ١٤٠ أو يتبردون بسرعه تحت ٤٠ بأسرع وقت ممكن ويتسخنون وقت الطبخ لأعلى من ١٤٠ عشان نقتل أي بكتيريا نمت عليها وقت التبريد.

      طبعا لو لاحظتي الأمثلة اللي حطيت زي المرق و الشوربه سهل التعامل معها كونها تتسخن وتتبرد بسهولة وممكن نفرزها أو نغليها بدون مشاكل و بدون ما تخرب أو يقل جودتها وعشان كذا هي آمنة نسبيا وتنحفظ وقت طويل. المشكلة هي في الأشياء اللي مانقدر نبردها لأنها تخرب أو تتغير إذا بردت أو تخرب إذا تسخنت لحرارات عاليه وبكذا ما نقدر نموت البكتيريا منها بشكل جيد.

      عموما الجواب البسيط على سؤالك هو بردي الأكل بأسرع وقت ممكن وسخنيه قبل الأكل لو كان يستحمل إنه يتسخن. هذا بيمشي مع أغلب الأشياء.

      • غير معروف permalink
        28/11/2011 2:16 ص

        جزاك الله الف خير … تقريبا فهمت …
        خلاص راح ابردها على طول اظمن … بس عند التسخين تفضل المايكرويف ولا البوتجاز افضل ؟؟ بحيث يقتل البكثيريا افضل ؟؟؟

        • 28/11/2011 2:36 ص

          طالما إن الحرارة ترتفع فوق ١٤٠ ما يفرق هذا المهم.

  14. غير معروف permalink
    27/11/2011 7:44 م

    السلام عليكم
    شيف بغيت أسألك عن الفرينش توست ، إنت قلت إنو التوست ماينفع لأن معه إضافات وكذا
    هل قصدك على التوست الجاهز حق السوبر ماركت؟
    لأني أعرف مخبز جيد .. اخذ التوست منه فريش بدون إضافات ومركبات .. ينفع أو لاا؟؟؟

    • 27/11/2011 8:14 م

      إذا الخبز ينشف إذا تركتيه وكان سميك ينفع هذي القاعده غير كذا خذي راحتك.

  15. غير معروف permalink
    27/11/2011 7:36 م

    ممكن طريقة الهوت شوكلت اذكر كنت منزل الطريقة بس مو لاقيتها

    • 27/11/2011 8:21 م

      ما أذكر نزلت طريقتها.

      عموما الطريقة سهلة ، تجيبين كوب وربع حليب مع ربع كوب قشطة خفق وتخلينها توصل لغليه خفيفه بعدين تطفين النار وترمين عليها شكولاته غامقة من أحسن نوعية عندك وتحركين إلين تذوب (شوفي موضوع الشكولاته عشان تعرفين وش أقصد أحس نوعية) و سكر حسب الرغبة و أي إضافات ثانيه تحبين زي بهارات أو فانيلا أو غيره.

      بالنسبة لي أسخن الحليب و القشطة مع نص عود فانيلا وبعدين أضيف شكولاته غامقة وبعدين آخر شي رشه ملح بحري (رهيب مع الشكولاته) بس الخيارا راجعلك.

      • غير معروف permalink
        27/11/2011 9:21 م

        ينفع شوكلاتة بودرة ؟

        • 27/11/2011 9:39 م

          ينفع شكولاته بودره وينفع مويه بعد بدال الحليب بس أنتي تبين تسوين مويه سوداء ولا أطعم هوت شوكلت ؟

  16. Chif of cake permalink
    27/11/2011 3:12 ص

    السلام عليكم …كل عام وانت بخير شيف عندي سؤال انا شريت فرن جديد ومو عارفه اضبط الحراره فيه درجة الحراره ١-٢–٣-٤-٥ وانا عندي ميزان حراره للفرن ومهما قللة الحراره فيه تظل مرتفعه مش عارفه المشكله في الفرن والا في ايش ؟

    • 27/11/2011 3:56 ص

      وعليكم السلام و الرحمة …

      هذي أرقام الغاز هي تعادل حرارات بس صعب التحويل أسهلك تشوفين الجدول اللي هنا:

      http://en.wikipedia.org/wiki/Gas_Mark

      لو حطيتي الفرن على رقم غاز معين مفروض الحراره تطلع وتنزل عن الحراره المفروضه بس موب مفروض تكون مرتفعه أو منخفضه أكثر من اللازم.

  17. غير معروف permalink
    27/11/2011 1:47 ص

    ممكن طريقة تخليل الخضار وخصوصا الخيار

    • 27/11/2011 2:20 ص

      تلاقين كذا طريقة في صفحة الوصفات

  18. 26/11/2011 5:46 م

    مرحبا توب شيف، يعطيك العافية ..
    جربت أمس عجينة الكرواسون كانت أكثر من ناجحة ما شاء الله وأحلى من السوق بعد؛ لكن شغلها طويل في الرّق والعجن ، ما أدري هل ممكن أسوي كمية و أفرزها على شكل شرائح رقيقة مربعة ؟ والا العجين بيتأثر ويخرب؟

    وممكن أستخدم العجينة نفسها في “الباي إن بوت” بدل شرائح البف بيستري؟

    • 26/11/2011 5:55 م

      أكيد تقدرين وماراح تتأثر كثير صعب مررره أحد يفرق بعد ولعلمك كثير من الفنادق و المطاعم وحتى مخابز كبيره يسوون كذا.

      يمديك تفرزين العجينة زي ماقلتي بس لو فكرتي فيها لو جيتي تسوين منها كروسان بعدين بيضيع جزأ من العجينة على الفاضي. أفضل حل تفرزين العجينة قبل الفرده الأخيره أو إنك تشكلينها وكل شي بعدين تفرزينها. إذا جيتي تذوبينها طلعيها قبلها بيوم من الفريزر وحطيها في الثلاجه طول الليل وبعدين طلعيها من الثلاجه على حراره الغرفه إلين توصل لحراره الغرفه وبعدين كملي عادي.

      تقدرين تستخدمين العجينة في بوت باي بس ما أنصح. البف بيستري تنفش أكثر من الكروسان و البف بيستري ما فيها نكهة الخميره اللي موجوده وهنا واللي ممكن تعطي نكهة شوي غريبه على الأكل اللي داخل الباي نفسه. غير كذا العجينة هذي لذيذه فحرام تضيع كشي جانبي إذا بتستخدمينها خليها هي أساس الأكله اللي بتسوين.

  19. غير معروف permalink
    26/11/2011 3:52 م

    شيف خالد ربي يعافيك وين اقدر احصل طريقتك للكريم بروليه وعندك وصفات كثيره شو اسماء المنتديات غير شمواه والمدونه وربي يوفقك ومزيد من التقدم

    • 26/11/2011 5:22 م

      http://msa6el.mbc.net/vb/tt68278.html

      كل شي في شمواه غير هذا الموضوع بس هو الوحيد اللي ما نزلته هناك.

  20. غير معروف permalink
    26/11/2011 3:09 م

    شيف قرات جوابك عن الزبده الحيوانيه والنباتيه

    طيب وين الافضل في المذاق النباتي او الحيواني ؟

    • 26/11/2011 3:44 م

      إذا قصدك بالمذاق وش ألذ في الدهن على خبز مثلا فأكيد الزبدة الحقيقية (يعني الحيوانية) هي ألذ شي. بس الموضوع موب موضوع طعم بقدر ماهو إن كل واحد له فوائد و إستخدامات غير الثاني لا تفكرين فيهم إنهم بدلاء أو مكافئين لبعض لمجرد إنه يربطهم إسم واحد. أمشي على اللي مكتوب في الوصفه.

  21. غير معروف permalink
    26/11/2011 11:47 ص

    مرحبا شيفنا العزيز

    وسنه هجريه جديده مباركه علينا وعليكم

    شيف ايش الفرق بين الزبده النباتيه والحيوانيه ؟؟

    وهل لكل وحده نتيجه مختلفه عند الاستخدام ؟

    • 26/11/2011 2:06 م

      هلا والله …

      كلمة زبدة للأسف توسع معناها وصارت تعني أشياء كثير وزادوا اللخبطة بعد يوم دخلوا كلمة حيواني ونباتي عليهم.

      الزبدة الحقيقية الأصلية هي عبارة عن دهن حليب مفصول. هذي هي الزبده اللي أحيانا يسمونها زبده حيوانيه ولو إنها تسمى زبده وبس في الغالب. زي ما تشوفين هي تحتاج حليب وعشان كذا كلمة زبده نباتيه شوي خطأ ؟

      الزبدة النباتية ممكن تكون شي من إثنين. إما إنها تكون زيت جوز هند وزيت جوز الهند مشبع بشكل كبير وعشان كذا يكون جامد على حراره الغرفه ويشبه الزبده في الشكل وهو بارد. أوممكن يكون زيت نباتي مهدرج أو كريسكو أو شورتنينج، الزيت المهدرج هو زيت عادي غير مشبع (صويا ، دوار شمس ، كانولا …. إلخ ) يهدرجونه بحيث يحولنه لزيت مشبع وثابت على حراره الغرفه وجامد وهذا يخلي شكله أبيض وجامد وعشان كذا فيه ناس يسمونه بعد زبده.

      عند الإستخدام و الطعم الفرق جدا جدا جدا كبير بينهم ولا ينفع يتبدلون ببعض في كل شي. نسبة المويه و الإضافات وحراره الذوبان و الإحتراق أو التدخين تختلف في كل واحد منهم بشكل كبير.

  22. Emi permalink
    26/11/2011 11:29 ص

    أنا قصدي أشياء مالحة مع الشاي يعني معجنات و ميني ساندويتش و موالح زي اللي تنعمل في حفلات الكوكتيل ..

    • 26/11/2011 1:56 م

      ما أعرف الصراحة

  23. غير معروف permalink
    26/11/2011 5:01 ص

    صبح الخير
    شيف اذا سمحت عندي وصفة بسكوت محشي تمر ويتغطى بجوز هند اوسمسم محمص
    مقاديره نص ك زبده نص ك زيت ٢ ونص ك طحين ١ م بكم بودر فانيلا تقريبا نص ك ماء او حليب
    سويتة وطلعت العجينه موناعمه تقول مجعدة والزيت باين عليها
    وش السبب يمكن يكون من الزيت
    شكرا 

    • 26/11/2011 5:09 ص

      ما أعرف الصراحة شوفي صاحبة الوصفه هي أحسن واحد يساعدك هنا.

  24. ايمان permalink
    26/11/2011 4:50 ص

    السلام عليكم ورحمة الله توب شيف اشكرك كتيييييييير علي المدونة لو سمحت بدي منك مقادير الكيك الاسفنجي انا بعملو حلو بس بحس كاتو المحلات اطري هل السبب انهم بيضيفوا محسن كيك ويااااااااااااريت كمان تتبيلة للدجاج متل كنتاكي وشكرا كتير الك

    • 26/11/2011 5:05 ص

      وعليكم السلام و الرحمة …

      بنزل الكيك الإسفنجي في موضوع مفصل إن شاء الله بس فيه كم موضوع قبله بخصوص القياس و كذا وبعدها هو إن شاء الله هو واحد من أهم أنواع الكيك وله خطوات و تفرعات كثير ومهم أغطيها كلها. محسنات الكيك لا تحطين في راسك إنها شي ناقص من عندك دورها أكبر في حفظ الكيك وقت أطول من إنه يخليه لين.

      تتبيلة كنتاكي أو أي مطعم صعب أعرفها ومهما حاولتي تقلدين راح تحطين في راسك دايما إنها موب الشي الأصلي حتى لو كانت ألذ (شفتها كثييييير). مثلا يجيني ناس يطلبون كيف يسوون همبرجر زي البيج ماك حق ماكدونالز و أستغرب الصراحة ؟ ليش تطلب وصفه شي سيء زي كذا ؟

  25. نور permalink
    26/11/2011 12:45 ص

    السلام عليكم
    شيف شلونك
    بسألك بخصوص الزبده اللي تيي فرش من المزرعه لونها ابيض مو اصفر نفس اللي نشتريها من الجمعيه
    هل اقدر استخدمها بالطبخ ؟
    و شلون اسويها بالبيت ؟
    لان طعمها يهبل صراحه و مو كل مره تتوفر عندي
    ناكلها مع التمر او الخبز
    و ممكن ما عليك امر تحط موضوع الاجبان ببالك ؟
    عساس تشرحه لنا اذا مافيه مانع
    و يعطيك الف عافيه

    • 26/11/2011 3:23 ص

      وعليكم السلام و الرحمة ..

      الزبدة والله علمي علمك مافهمت الصراحة وش تقصدين بالضبط. لون الزبده ماله علاقه بجودتها هو بيختلف حسب فصيلة البقر و الموسم و العلف. إذا كانت زبده وش قصدك بكيف تسوينها في البتي ؟ ماعرفت الصراحة بس متأكده إنها زبده ولا أنتم بس تسمونها زبده ؟

      موضوع عن الأجبان إن شاء الله الفكرة موجوده من زمان بس نمشي بالأولويات حبه حبه.

  26. Emi permalink
    25/11/2011 11:50 م

    مرحبــــا شيف ..
    معليش راح اتعبك معايا شوية ..
    عندي هليون أعتقد انه مخلل ( في قارورة قزاز ) حبيت اجربه بس مو عارفة ايش ممكن أعمل بيه
    عندي طلب ثاني .. راح يكون عندنا ضيوف هذا الاسبوع وراح نعمل أشياء خفيفة مع الشاي .. بدي أفكار ايش ممكن أقدم مع الشاي أو أفكار للكنابيه ..
    يعطيك العافية يااارب

    • 26/11/2011 3:20 ص

      الهليون كل معرفتي فيه طازج الصراحة ماقد ذقته من علبه أو مفرز أو غيره فما أعرف وش طعم اللي تقصدين.

      أفكار لأشياء مع الشاي والله ما يحضرني شي الحين بس أحس الشي المعتاد حلو يعني كيك وكوكيز وبسكوت وسكونز وهذي الأشياء.

  27. غير معروف permalink
    25/11/2011 11:43 م

    أهلا شيف ..
    أول شي ألف ألف شكر على كل الوصفآت و النصآئح اللي بتقدمهآ لنآ ..
    الله يعطيك العآفية و يجعلـه في ميزآن حسنآتك إن شآء الله ..
    كنت بدي أسئلك عن الكب كيك أنا بستعمل طريقة معنية هي حلوة أه بس بحسها ثقيلة شوية ففكرت إنو أعمل كيكة إسفنجية ع شكل كب كيك و مش عآرفة إذآ ينفع و لآلآ ؟
    بالنسبة لوصفة الكوكيـز ينفع أحط سكر عآدي بدل السـكر الأسمـر ؟
    و كمآن في وصفآت كثيرة بيكون نفسي أعملهآ بس بلآقي إنو فيهآ قشطة و أنآ هون مآ عندي قشطة و دورت عليهآ و مآ لقيتهآ هل ينفـع أستبدلهآ بشي ثآني ؟
    ميـرسي كثيـر يآ شيف ..
    معلش تعبـتك معـي و كثرت عليـك أسئلة ..

    • 26/11/2011 3:17 ص

      كب كيك إسفنجي ممكن ولو إنه شخصيا ما يعجبني. الكيك الأسفنجي صح خفيف بس هو ناشف و مافيه نفس طعم كيك الزبدة العادي.

      الكوكيز شوفي هنا فيه كل شي عنه :

      http://www.shamoa.com/vb/showthread.php?t=31588

      بالنسبة للقشطة و أي تبديل عموما لازم تعرفين فايدة المكون أول عشان تقدرين تبدلينه. مافيه بديل للقشطة علطول للأسف.

  28. 25/11/2011 6:54 م

    السلام عليكم ^^ من متابعينك انا طبعاً
    ماشاء الله وش اقول بس !
    استمتع وانا اقرا ردودك
    لكن للأمانه عندي ملاحضه صغيرونه ^^
    انت كلامك دايم تشرح فيه وهذا شي حلو بحيث نعرف وش نسوي بالضبط
    لكنه بنفس الوقت صعب اذا جينا بننقل الطريقه !! يعني مو معقوله بنكتب كل كلامك كله .. دايم اعاني اذا جيت انقل طريقه منك والسبب هالشي ..

    +

    نتمنى نشوف اكلات منا وفينا هههههه يعني حنا سعوديين وتعرف مودنا مو جونا ستيك بصوص البرتقال وهالاشياء
    ماقلت لك نبي كبسات وهالاشياء بس برضو اشياء ممكن ناكلها :(

    ماعلينا :$ عندي سؤال
    قريت بعجينه البيتزا انو لازم يكون عندي حجر البيتزا وانت جبت 3 حلول

    الحل الثاني و أعتقد الحل الأسهل هنا هو إنك تستخدمين صينية فرن مقلوبة في الرف السفلي للفرن . الصينية راح تسخن وتعطي حرارة بسرعة للعجينة في البداية بس كونها معدن راح تبرد بسرعة ، غير كذا المعدن ما يشرب الرطوبة . بس أحسن من ولا شي صدقيني و النتيجة جدا ممتازة ترى

    هالحل مافهمته شلون ؟ ياليت تشرح ^^

    • 25/11/2011 10:02 م

      وعليكم السلام و الرحمة …

      بالنسبة للملاحظة الأولى ما يحتاج تنقلين الكلام أفهميه و لخصي الوصفه حسب ما فهمتي عاد بس مسألة إني آكل من التفاصيل عشان تصير الوصفه تنكتب أسهل هذي مستحيل أسويها الصراحة. لو تبين يمديك تطبعين الوصفه أو تحفظينها في الكمبيوتر في المفضلة وخلاص ما يحتاج تكتبينها على ورق أحس.

      بالنسبة للوصفات لازم تعرفين إن المدونة مدونة شخصية. كل وصفه أنزلها أحاول أنقل نظرتي وذوقي الشخصي في الأكل لك. أنا منيب ملزم أبدا أنزل وصفه لمجرد إن ناس طالبينها كل شي موجود في النت لو دورتي بتلاقينه أكيد إني أرجع و أنزل شي من جديد وش الفايدة ؟. عشان كذا دايما أنزل الوصفات بالطريقة اللي أنا أحب و أحاول أعطيك طرق و أشياء تقدرين تبدلين وتغيرين فيها بحيث تسوينها على ذوقك أنتي. لو بقعد أدور أغلب السعوديين وش ياكلون منيب طالع عن جبن سايل وقشطة خفق وصدور دجاج وقشطة التاج و بطاطس وطبعا جلكسي. وش اللي يمنع إن الواحد يجرب شي ما يعرفه أو يتوقع طعمه ؟

      البيتزا إذا تبين تشوفين الطريقة بالصور أفتحي على موضوع خبز النان في المدونة مستخدم فيه هذي الطريقة.

  29. zaINAB permalink
    24/11/2011 11:57 ص

    مرحباا من جديد

    يعطيك العافييه ,,
    بالنسبه لحجر البيتزا ضروري يكون حجر طبيعي ولاعادي جرانيت وسراميك ؟

    وش الفرق في انواع البقدونس احيانا اخذ شي ويكوون نكهته مرررة اشوي ..

    • 24/11/2011 3:04 م

      هلا والله …

      حجر البيتزا تكلمت كثييييير عنه راجعي موضوع البيتزا فيه كل شي أعرفه هناك

      البقدونس أنواع بالضبط زي ما قلتي. يمكن أشهر فرق هو اللي يكون مسطح الورق و اللي يكون متشعب الورق وكل واحد له نكهة غير.

  30. غير معروف permalink
    24/11/2011 9:15 ص

    مرحبا شيف ،
    شيف الله يعافيك بغيت طريقة مافن التفاح
    انا كنت ناوي ابدل في وصفة مافن البلوبيري يس واجهتني شوي صعوبات ، ف ممكن تضبطها لي ؟

    • 24/11/2011 9:39 ص

      طعم التفاح لحاله بيكون غريب ، التفاح يحتاج دايما مساعدة إذا أنطبخ لحاله ماله طعم واضح وعشان كذا صعب شوي يتبدل زي البلوبيري. فيه وصفه حلوه لمفن تفاح تلاقينها في صفحة الوصفات.

      • غير معروف permalink
        24/11/2011 12:27 م

        الله يجزاك خير، طيب شيف ممكن اعرف بالضبط وشو صوص التفاح؟ وهل يمكن عمله فالبيت؟

        • 24/11/2011 3:09 م

          صوص التفاح أو ال apple sauce صوص مصنوع من تفاح مطبوخ ومهروس وقت طويييييل. يستخدم مع الأكل الحلو و المالح بشكل كبير.

          تقدرين تسوينه في البيت بس هو مشكلته يحتاج أنواع تفاح خاصه عشان يضبط. أحسنلك و أسهلك تشترينه تلاقينه في السوبرماركت غالبا جنب النوتيلا و المربيات وهذي الأشياء.

  31. غير معروف permalink
    24/11/2011 6:40 ص

    شكرا شيف رح احاول ابتعد عنها وحجرب النودلز واردلك خبر
    شكرا لك

  32. أم رهف permalink
    24/11/2011 6:24 ص

    صباح الخير..
    ينفع أسوي الكريم فريش وأستعمله في التشيزكيك بدل الساور كريم وفي فرق في النتيجه؟

    • 24/11/2011 6:38 ص

      ينفع ليش لأ ، الفرق بينهم جدا بسيط هذا إذا ماكان أغلب الناس ما يفرق بعد.

  33. غير معروف permalink
    24/11/2011 4:38 ص

    السلام عليكم

    كيف الحال ؟؟

    س \ عادي استخدم الخردل العادي بدل الديجون في الوصفات خاصه الماك آند شيز ؟؟

    و شكراً

    • 24/11/2011 5:26 ص

      وعليكم السلام و الرحمة …

      الماك آند تشيز نحتاج بودرة خردل موب خردل جاهز ولا ديجون ؟

      تقدرين تبدلين الديجون بالعادي و العكس غالبا بس الطعم بيتغير.

  34. غير معروف permalink
    24/11/2011 3:34 ص

    اهلين شيف ايش اخبارك
    شيف حبيت اسئلك على الاندومى انا كتير احبها ومن اكلى المفضل وحتى اطفال العيلة كتير يحبوها
    وانا خايفة الصراحة على الاطفال وعلى نفسى منها …يقولون انها ابدا مش كويسة وفى مواد مضرة
    فقلت انت الوحيد الى تقدر تساعدنى فى ها الموضوع
    وشكرا لك وعسى الله يجعله فى ميزان حسناتك

    • 24/11/2011 4:19 ص

      الخطر من الإندومي صح موجود بس شوي مبالغ فيه من العالم. اللي يضحك في الموضوع إن فيه آلاف المنتجات اللي الناس يشترونها ويحسبونها عادية وهي بنفس الضرر أو أكثر بعد أبسط مثال على هذا بعض أنواع الخبز الجاهز و البف بيستري و تغطيات الكيك الجاهزة و الماجي وغيرها كثيييييير.

      الإندومي عبارة عن نودلز بيض مسلوقه نص سلقة وبعدين مقلية ومجففه. القلي غالبا ما يكون بزيت جوز هند وزيت جوز الهند أكثر زيت فيه دهون مشبعه وهذا واحد من الأشياء اللي تخلي الناس يحذرون منه. الدهون المشبعة مرتبطة بأمراض القلب و الشرايين وهذا مصدر الخوف منها.

      الشي الثاني هو البهارات اللي يحطونها معه. في شرق آسيا ياكلون النودلز مع مرق وهنا عشان يسهلون الموضوع يسوون مرق فوري أو جاهز. المرق الجاهز اللي يسوون غالبا عباره عن كوكتيل من خضروات مجففه ونكهات صناعية و طبعا عشان ما يبان الطعم الصناعي يضيفون محسنات نكهة وملح. هذي المواد كثير منها ضار ، مثال على هذا عندك الإم إس جي أو الملح الصيني اللي عبارة عن محسن نكهة ويستخدمونه بكثره هنا. الإم إس جي أرتبط بأمراض كثيييييير وممنوع في دول كثيره أولها أمريكا.

      غير السببين هذي فيه سبب ثالث يكره أخصائيين التغذية منها وهي إنها مليانه سعرات بس كلها سعرات فارغه بمعنى إنها سعرات بس بدون قيمة غذائية مصاحبة لها.

      عموما منيب قايل إنها مفيدة إلا هي مضره لو فكرتي فيها بس الإعتدال حلو في كل شي. تقدرين ترمين البودرة اللي تجي معها وتسوين أطباق ثانيه كثيره من الإندومي. شوفي موضوع “تايلند : نوودلز الفول السوداني” جربي الوصفه بالإندومي وعطيني رايك.

  35. غير معروف permalink
    24/11/2011 1:28 ص

    هاه ياشيف نزلت الكب كيك
    ومشائك سعيد

    • 24/11/2011 4:01 ص

      شيكي المدونة إذا مافيه يعني ما نزلت

  36. غير معروف permalink
    23/11/2011 10:29 م

    مساءالخير
    ادري ان سؤالي غبي بس الشكوى لله،،
    اخوي يدرس في كندا(تورنتو) ويبي يرجع بعد كم يوم ودي اوصيه يجيب اعواد الفانيلا بس مدري في اي المحلات يلقاها لأن معلوماته صفر في المطبخ..
    وش اسم افضل شوكلاته خام ممكن اعطيه اسمها عشان يجيبها،،
    وجزاك الله خير

    • 24/11/2011 4:01 ص

      تورونتو ما أعرف والله ؟ بس يلاقيها في النت أفضل و أرخص. إذا يبي من محلات خليه يروح سوق المزارعين أو ال farmer’s market هناك أكييييييد فيه محل أو محلات بهارات و أغراض طبخ وبيلاقيها هناك أكيد.

      أختي لو فيه ماركة شكولاته أحسن من كل الماركات ما كان تعبت نفسي وكتبت موضوع طويل عريض عنها، حتى في النت لو قريتي بتلاقين نفس الكلام اللي أقول هي مسألة أذواق. إذا تبين ماركات معروفه ومشهوره بس من الحين أقولك موب بالضروره تعجبك راجعي الردود في موضوع الشكولاته.

  37. غير معروف permalink
    23/11/2011 10:10 م

    هلا توب شيف
    بسأل
    شو هو ال creme fraiche ? ينشرى جاهز والا له طريقة؟

    • 23/11/2011 10:23 م

      هلا والله ….

      الكريم فريش منتج ألبان مخمر زي اللبن و الزبادي و الساور كريم. يمكن أقرب شي له هو الساور كريم وغالبا يستخدمون بدال بعض بس هم غير. تقدرين تشترينه بس ماأعتقد متوفر عندنا في السوبرماركتات حقتنا ويمديك تسوينه بسهولة بعد. تخلطين كوبين قشطة خفق قصيرة الأجل مع ربع كوب لبن وتحطينهم في علبة قزاز أو معدن على حرارة الغرفة وتغطينه بنايلون. بعد ٨ – ٤٨ ساعة بيكون ثقل ، كل ما تخمر أكثر كل ما حمض وثقل أكثر بس هو راجعلك كم تبينه يتخمر. بعد ما يوصل للطعم اللي يعجبك حطيه في علبه تتقفل بإحكام في الثلاجه يعيش إلى أسبوعين أو أكثر وهذي طريقة ممتازه بعد لإستخدام الكريمة الزايدة عشان ما تخرب

  38. Emi permalink
    23/11/2011 3:43 م

    أقصد الماشد بوتيتو حابة اضيفله نكهة .. أعشاب مثلا أو جبن تشيدر ..بس خلاص يعطيك العافية .. شكلي بخليه سادة لأن نكهة الدجاج راح تكون قوية نسبياَ

    • 23/11/2011 5:40 م

      ليش لأ تقدرين بكل سهولة.

  39. غير معروف permalink
    23/11/2011 3:34 م

    هلا توب شيف
    مر عليّ رد من قبل لوحدة سألتك عن البامية وكيفية طبخها لتفادي لزوجتها
    ما عليك أمر ممكن تقول لي الطريقة؟
    ولو عندك وصفة مميزة ليخنة بامية تسوي فيني خير

    • 23/11/2011 5:46 م

      هلا والله …

      مافيه طريقة تتفادين اللزوجة في كل الأكلات بالعكس اللزوجة هي سبب حب ناس كثير للباميه (شخصيا منيب واحد منهم). بس فيه طرق ثانيه لطبخ الباميه تعطيك الوجه الثاني لها اللي ناس قليييييييل يعرفونه للأسف. شخصيا ما أحب يخنة البامية ولا أحب القوام اللزج حقها بس عموما هي فكرتها سهلة . كل اللي عليك تسوينها إنك تسوين يخنة لحم عادية وبعدين تثقلينها بالبامية آخر شي.

      المقلية جدا سهلة ، طبعا عندك أكثر من طريقة للقلي لو تبين سويها تيمبورا زي هنا :

      http://topchefcooks.com/2011/06/06/tempura/

      أو يمديك تسوينها بالطريقة العادية بإنك تشيلين الجذر حقها بعدين تغطسينها في طحين مخلوط معه شوي ملح وفلفل وفلفل أحمر حار أو بابريكا وبودرة ثوم و بعدين بيض وبعدين بقسماط وتقلينها في زيت حار.

      الباميا المخللة :

      نص كيلو باميا لينه يعني لا تصير مخشبة
      ١/٢ ملعقة صغيرة فلفل أحمر مجروش
      ملعقة كبيرة بذور خردل
      ملعقة كبيرة ونص بذور شبت أو اللي يسمونها عين جرادة
      ٦ فصوص ثوم كاملة
      ملعقة صغيرة فلفل أسود كامل
      نص ملعقة كبيرة ملح
      ملعقة كبيرة سكر
      ٣ أكواب خل تفاح
      كوب مويه

      أغسلي البامية بعدين حطي فص ثوم داخل كل مرطبان تخليل (يعني تحتاجين ٦ ). الحين رصي البامية في المرطبانات.

      في قدر صغير حطي باقي المقادير كلها وخليها تطبخ إلين توصل غليه ويذوب الملح و السكر بعدين صبي السائل على البامية اللي في المرطبانات بالتساوي. خليها شوي إلين يطلع البخار الحار بعدين قفلي المرطبانات وخليها على حرارة الغرفة إلين تبرد شوي بعدين دخليها الثلاجة. خليها في الثلاجة يوم على الأقل عشان يمديها تتخلل. هذي المربى موب معقمة ولا راح تعيش وقت طويل زي المربى حقت السوبرماركت فعشان كذا دايما أحفظيها في الثلاجة ولا تخلينها أكثر من ٣ أسابيع إلى شهر

  40. Malak permalink
    23/11/2011 3:09 م

    السلام عليكم
    توب شيف ودي اسالك اذا عندك وصفه للستيك بالصويا صوص بالطريقه الاسيويه ,, ويكون مرات معاها بصل او فلفل اخضر

    • 23/11/2011 5:39 م

      وعليكم السلام و الرحمة …

      شوفي موضوع البيرو : لومو سالتادو أعتقد شي زي كذا اللي تبينه ؟

  41. zaINAB permalink
    23/11/2011 1:43 م

    مرحببببا

    هل الريحان نفسه المشموم والحبق؟
    لما ابحث في النت الاقيهم الثلاثه بنفس الاسم
    احنا نزرع المشموم بشكل كبير بس مشكله ما استصيغ اكله لانه طعمه عطري قوووي كني جالسه اكل شي جايه عطر
    بالاضافه ان لون الورق غير الي اشوف يستخدموه في برامج الطبخ ذاك اخضر زاهي و الي معنا لونه يقلب على بنفسجي
    ,,,
    جبن البراميزان كيف احفظها شاريه كميه هل ابشرها و اخليها في الفريزر ولا عادي ما تخرب في حافظه بالثلاجة؟
    ,,,
    هل جربت تزرع الاعشاب ذي(اكليل الجبل, الاوريجانو, الريحان,) لانها ما تتوفر على طول وشايفه بذر
    ,,
    كيف اعرف زيت الزيتون الجيد من السيئ؟

    ننتظررر موضووع الكوفي باحر من الجمرررر ارجووك اجل كل المواضييع بعده ^_^
    والله يعطيك العافيه و يوفقك يا بطل

    • 23/11/2011 2:56 م

      هلا والله …

      ما أعرف المشموم الصراحة وكثير ناس سألوني نفس السؤال، يمكن يكون هو ويمكن لأ بس في الأعشاب دايما فيه لخطبة وتسميه أعشاب بأسماء ثانيه في أمكان مختلفه. نفس الكلام على الحبق في لبنان يسمون الريحان حبق بس هنا فيه حبق وعشان كذا بقول لأ هو غير. عموما الريحان أحس مشهور مره.

      الريحان وكل الأعشاب العطريقة ما تنوكل لحالها، طعمها مر هذي معروفه اللي نبيه منها هو الصفة العطرية اللي ذكرتي عشان كذا تنخلط مع الأكل موب عشانها هي نفسها أكل.

      الريحان يجي أنواع جدا جدا جدا كثيره وكل واحد بنكهة شوي مختلفه بس مع النكهة الأساسية له موجوده في كلهم. الريحان اللي تقصدين هذا ريحان جنوا أو ريحان إيطالي بس هو موب النوع الوحيد المستخدم، فيه أنواع ريحان لونها أزرق أو بنفسجي زي ماقلتي هذا ما يخليها موب ريحان ؟

      البارمزان لفيه بورق شمع (موب ورق زبدة) بعدين حطيه في كيس أو علبة تتقفل في الثلاجه بدون بشر. تقدرين تفرزينه بس بيخسر طعمه بشكل جدا سريع خصوصا لو كان من الأنواع الممتازه ،كل النكهات الضعيفة الخفيفة فيه بتروح بسرعه.

      نعم جربت زرعت هذي الأعشاب بس بطريقة جدا سهلة عن طريقة جهاز زي هذا :

      أغلب الأعشاب جدا جدا جدا سهل زراعتها في البيت وشفت ناس كثير مسوينها بس عمري ما جربت شخصيا.

      زيت الزيتون بتسمعين كلام كثيييييير كل واحد يفتي وكل واحد يتفلسف هي مسألة جدا سهلة إذا حطيتيها في بالك في أي أكل بتعرفين تختارين. زيت الزيتون إذا قلنا جيد نقصد إنه أطعم بس ، عشان كذا لااازم لازم تذوقينه عشان تعرفين هذا الحل السهل و الأفضل. ناس بتقولك شوفي اللون وهذا خطأ ، ناس بتقولك شوفي الصفاوة وهذا بعد خطأ وناس بقولك اللي يجي بتنك من فلسطينيين هذا الجيد وهذا بعد خطأ. خيارك الأفضل هو التجريب إلين تلاقين نوع يعجبك.

      قبل كل شي أعرفي إن اللي ما يكلف نفسه ويعبي الزيت في علبه مناسبة هذا موب شخص فاهم في الزيت ولا تتوقعين إنه بيعطيك أفضل زيت وعشان كذا بعدي عنه من البداية لا تتعبين نفسك معه. العلبة مفروض تكون معدنيه من تنك أو ستانلس أو مصنوعه من جزازمكتم أو ملون. أي شي في علب بلاستك أو علب شفافه شيليه من القائمة اللي بتجربين. إذا جيتي تذوقين الزيت شميه بشكل جيد وبعدين ذوقي شوي منه و أحكمي. الزيت لاااازم يكون له ريحه فواحة تشمينها من بعيد من يوم تفكين العلبه ، إذا ماكان له ريحة كنسلي النوع هذا علطول. طعم الزيت بيختلف حسب النوع بعض الأنواع طعمها قوي وبعضها هادية وبعضها بنكهات حلوه وعطريه وبعضها بنكهات أغمق وتميل للخشب تقريبا هنا المسألة شخصيه تقدرين تشترين كذا نوع بكذا نكهة غير وكل نوع يمشي مع أكل غير بشكل أفضل بس عموما هو شي راجعلك. الطعم مفروض ما يكون مر ولا يترك طعم سيء على اللسان هذا يمكن أهم شي في الذوق غير كذا زي ماقلت الطعم و النكهة هي المحدد الأساسي للجودة.

      موضوع القهوة والله صعب حاليا لأني في السعودية الفترة هذي وبعيد عن عدتي.

  42. غير معروف permalink
    23/11/2011 11:09 ص

    سلام شيفنا

    ابغى أشتري جبن قشقوان .. شنو اسمه بالإنجلش؟؟ .. لاني حالياً في بلد أجبني..شكراً

    • 23/11/2011 2:25 م

      وعليكم السلام ..

      كشكفال تلاقينه في البقالات العربيه و اليونانيه kashkaval cheese

  43. Emi permalink
    23/11/2011 10:26 ص

    صباح الخير شيف ..
    عندي سكر بني غاااامق ينفع اعمل فيه الدجاج ببهارات الكيجن ؟! لأني جرته بسكر بني وسط وكان تمااام وخايفة أغامر لأني بعمله لضيوفي
    طيب لو ما ينفع ايش رايك اتبله بالصلصة الفرنسية أو الهوني مسترد أو البلسميك فينجريت ؟؟ احترت بينهم !!! وايش نكهة الماشد بوتيتو المناسبة للتتبيلة ؟!
    سؤال أخير .. بدي طريقة أحافظ ببيها على جودة الطبق وحرارته وقت التقديم .. لأني مضطرة أطبخه بدري عشان ما تصير ريحة البيت طبخ والضيوف موجودين
    يعطيك العافية

    • 23/11/2011 2:25 م

      صباح النور …

      ينفع عادي ، لو خايفه حطي أقل من أول وخلاص.

      ينفع تستخدمين الثلاثه بس طبعا بكمية قليلة كونهم قويين مره، يعني الهوني مسترد و الصلصة الفرنسيه يكفي إنك تدهنين الدجاج فيها بس البلسمك عشانه أضعف تتتبلين فيه عادي. الماشد بوتيتو معليش بس ما فهمت السؤال ؟

      مافيه أي طريقة بتحافظ على جودة هذا الطبق زي ما كانت أول ما طلعت من الفرن. الدجاج بينشف أو الرطوبة بتتكثف عليه وكلها تخرب الطعم. يمكن أفضل حل لك تحطينه في صحون البوفيه بس يكون قبل التقديم بدقايق مافيه شي بيخليك تسوينه قبلها بوقت طويل إلا إنك تطبخينه وتسخنينه من جديد.

  44. غير معروف permalink
    22/11/2011 8:36 م

    برايك وش احسن تغطية لكيكة الزنجبيل
    ذوقك يعجبني

    • 22/11/2011 8:54 م

      أحس خياراتك كثيره. الزنجبيل يمشي مع نكهات كثيره ، تقدرين تسوين تغطيه كريم تشيز بتكون رهيبة مع هذي الكيكة ، تقدرين تسوين تغطية بنكهة قرع أو جزر أو حتى بطاطس حلو أو جزر يماني كل هذي النكهات رهيبة مره مع الزنجبيل. تقدرين طبعا تروحين لشي سادة ومألوف زي الفانيلا.

      لو علي بسوي بتر كريم بنكهة قهوة أو إسبريسو أحسه بيكون مره مره رهيب هنا لأني أحب الزنجبيل مع القهوه بس هي شي راجعلك كل اللي فوق بيكونون رهيبين مع هذي الكيكة.

  45. غير معروف permalink
    22/11/2011 8:34 م

    لو سمحت دبس السكر هو العسل الاسود وهو مر صح
    يعطيك العافية

    • 22/11/2011 8:57 م

      صح هو العسل الأسود بس بعد فيه عسل طبيعي أسود فلا تلخبطين بينهم. هو موب مر مر هو فيه مراره صحيح من الشوائب اللي معه بس صعب نعتبره مر. دبس السكر أعرفي إنه يجي بدرجات حسب كمية الشوائب اللي فيه فحاولي تلاقين من الأنواع اللي تكون درجة أولى أو فاتحة لو أمكن هذي أسهل تدخل في الوصفات من الأنواع الغامقة مره اللي يكون طعمها شوي قوي أكثر من اللازم.

  46. Emi permalink
    22/11/2011 7:39 م

    مرحبا شيف ..
    عندي كم سؤال .. الأول بخصوص صلصة الرانش .. اللبن المستخدم سائل ؟؟ لأني جربتها بس حسيت الصلصة مرررة سايلة
    السؤال الثاني .. عملت عجينة التارت الحلوة وصغرت بعد الخبز .. النتيجة كانت تمام بس بدي أعرف السبب في انها اتقلصت
    السؤال الثالث .. ايش الخطر في استخدام الكريمة اللي لها اسبوع أو اكثر في الثلاجة ؟! لأني بصراحة استخدمها وما عندي فيها اي مشاكل بس احرص اني استخدمها في الطبخ بحيث انها تتعرض لحرارة

    يعطيك العافية و شكراَ مقدماَ

    • 22/11/2011 7:53 م

      اللبن سائل زي ماكتبت في الوصفه. الصلصة مفروض تكون ثقيلة شوي بس موب ثقيلة مره مره زي الجاهزة. إذا تبين قللي اللبن أو حطيها كم دقيقه في الثلاجه.

      عجينة التارت و أي عجينة قصيره بتقصر في الفرن إذا تكون فيها جلوتن أكثر من اللازم. هذي موب بس بتخرب الشكل هذي بعد دليل إن العجينة أقسى مما هي مفروض تكون. الجلوتن يتكون بوجود المويه وبالعجن، من يوم تخلطين طحين مع مويه يبدأ الجلوتن يتكون وكل ما عجنتي كل ما تكون أكثر و أكثر وهذي هي الصعوبه الكبيره في عجاين التارت اللي ناس كثيييير يتهاونون فيها. المره الجايه أنتبهي للقياسات بشكل جيد و أهتمي إن كل شي يكون بارد مره زي ما طلبت في الموضوع وحاولي ما تحركين العجين أكثر من اللازم يعني ما تعجنينه كثير وترصينه شوي شوي.

    • 22/11/2011 8:03 م

      حسب كيف يبسترون ويعلبون الكريمة بتختلف مدتها بعد الفتح. في كندا صلاحية الكريمة ٣ أسابيع تقريبا بس هنا في السعوديه ٣ أيام بعد الفتح حسب علمي. غالبا تواريخ الإنتهاء اللي على الأكل مختلفه عن التواريخ الحقيقه وماخذين إحتياط بس هل يوصل الإحتياط ل كم أسبوع بعد التاريخ المفروض أحس فيها مقامره. الكريمة بتحمض وبتعفن مع الوقت حتى في الثلاجه ، هذا بيغير ريحتها وطعمها و أحيانا يخليها مضره وسامه. حتى لو ما شفتي أي علامه من علامات فساد الأكل عليها هذا ما يعني إنها ما خربت أو بدت تخرب. في فساد الأكل أنتي تتعاملين مع كائنات حيه وصعب إنك تحطين وقت مضبوط لخراب أو فساد أكل بس اللي لازم تعرفينه إن كونك كل مره تسوين هذا الشي ما يعني إنه صحيح فأفضل تمشين على اللي كاتبن. الحراره ما تموت كل شي ولا تصلح خراب الطعم فالغليان بعد موب حل ولا كان غلينا الحليب القديم كل مره وخلاص.

  47. نور permalink
    22/11/2011 6:01 م

    السلام عليكم شيف
    الدياي عندنا صغير و الجوانح ظعاف حيل مافيها مجال اني اسوي منها بفولو وينج
    و الدياي نفسه لو حطيت عليه زيت زيتون و ملح و فلفل و داخل الدياي زعتر بري و دخلته الفرن يطلع زفر
    اما دياي الدول الاجنبيه اييك مربرب و كله لحم الجناح شمتنه
    و مجرد زيت زيتون و ملح و فلفل بالديايه و ادخلها الفرن تطلع و لا اروع و خنينه
    ليش ؟
    شنو السبب
    و ممكن القى دياي مربرب بدولنا العربيه

    • 22/11/2011 6:31 م

      وعليكم السلام و الرحمة …

      الزفرة في الدجاج سببها نوعية الدجاج و التربية و التخزين. للأسف عندنا المحدد الأساسي هو السعر هذا هو الشي الوحيد اللي الناس تدوره وعشان كذا طبيعي شركات الدواجن يهتمون بالسعر أكثر من الجوده. بالنسبة للحجم بعد هو شي ثاني الناس ماخذينه خطأ وهو إن الدجاج الصغير ألذ من الكبير وهذا بعد خطأ عشان كذا تلاقين متوسط أوزان الدجاج عندنا أقل من عندهم وهذا إما إنه بسبب سوء تغذية أو الذبح في عمر صغير.

      تلاقين غالبا أكثر من نوعية دجاج جربي أكثر من نوع إلين تلاقين واحد زين. أحيانا نفس الشركة تلاقينها زينه بس السوبرماركت اللي يبيعونه مهملين خطوات النظافه والحفظ فلو لقيتي المشكله هذي غيري السوبرماركت. تقدرين بعد تشترين دجاج مفرز مستورد بسعر أقل من الوطني غالبا.

  48. غير معروف permalink
    21/11/2011 6:24 م

    السلام عليكم و رحمة الله و بركاته
    عندي سؤال بخصوص الخبز..سبق و ذكرت
    في الموضوع الخاص بأنواع الطحين و الخبز
    أنه ما نستخدم طحين الكيك للخبز..
    بس أنا شفت وصفة لخبز يخلطون فيها
    طحين الخبز مع طحين الكيك!!
    فبغيت أعرف الفائدة من هذا الخلط؟
    و ماذا ستكون نتيجته على الخبز؟؟
    و أشكرك مقدما

    • 21/11/2011 6:49 م

      وعليكم السلام و الرحمة …

      اللي سوا الوصفه زي اللي يقول وين أذنك يا جحى هي خطوة شوي غريبة إذا فكرتي فيها. طحين الكيك لين يعني فيه نسبة بروتين قليلة وطحين الخبز قاسي يعني فيه نسبة طحين عالية اللي يسوونه هو إنهم يصنعون طحين ثاني فيه نسبة بروتين أقل من الخبز بس أعلى من متعدد الإستخدامات بإنهم يخلطون الإثنين بنسب محدده. في الخبز إحنا نحتاج شبكة جلوتن قويه عشان تحبس الهواء بشكل جيد وتعطينا خبز منفوش بس في نفس الوقت الجلوتن واحد من أسباب قساوة الخبز وعشان نسوي خبز ناجح ومنفوش وفي نفس الوقت لين نحتاج أحيانا إننا نقلل نسبة البروتين في الطحين اللي نستخدم.

  49. امل permalink
    21/11/2011 6:22 م

    السلام عليكم.انا شريت صينية سليكون من محلات ابوريالين(بس هي ب25)وحطيت فيها حلا ودخلتها الفرن, وهي بالفرن اشم ريحة الصينية, بس الادهى والامر ان الحلا بعد مابرد واكلته طلع فيه ريحة الصينية نفسها(ريحة بلاستك عجيبة)انا هنا خفت من هالصينية هل يمكن تكون غير مخصصة للفرن,الصينية ماعليها اي معلومات.
    بصراحة ضاق صدري مرررررة,واحترت,بس قلت مالي الا انت,اخذمنه المعلومة الصحيحة وانا مغمضة.
    الله يجزاك بالجنة,والله انك تفرج كرب وتحل مشاكل وتساعد الناس بفضل هالمدونة الرائعة(فاحتسب الاجر)لانه باب من ابواب الخير,

    • 21/11/2011 6:44 م

      وعليكم السلام و الرحمة …

      صياني السيليكون طبيعي يطلع فيها ريحة أول مره وبعدين تقل بعد الإستخدام هذا الشي يزيد إذا ما غسلتي الصينية أول ما جبتيها من المحل.

      • امل permalink
        21/11/2011 8:07 م

        الله يبشرك بالخير

  50. غير معروف permalink
    21/11/2011 6:31 ص

    يسعدلي صباحك

    شيف شو نوعية الجبمه الممستخدمه بالمناقيش تكون مالحه ومطاطيه؟

    • 21/11/2011 6:53 ص

      أغلبهم يستخدمون جبن إسمه جبن قشقوان أو كاشكافال .

التعليقات مغلقة.

تابع

Get every new post delivered to your Inbox.

Join 376 other followers

%d مدونون معجبون بهذه: